Ўзбекистоннинг турли ҳудудларида аҳолига ажратилган суюлтирилган газни тижорий нархда сотиш мақсадида ноқонуний сақлаш билан боғлиқ етти ҳолат аниқланди. Уларда жами 249 та газ баллонидаги 1 160 килограмм газ ноқонуний сақлангани маълум бўлди. Бу ҳақда Давлат хавфсизлик хизмати хабар берди.

Қайд этилишича, 9 ноябрь куни ДХХ, Бош прокуратура, Ички ишлар вазирлиги, Фавқулодда вазиятлар вазирлиги, “Ўзенергоинспексия” ҳамда “Ҳудудгазтаъминот” АЖ ходимлари ҳамкорлигида назорат тадбирлари ўтказилган. Аниқланган ҳолатлар орасида газ таъминоти тизимининг айрим ходимлари билан боғлиқ қонунбузилишлар ҳам бор.

Жумладан, Қорақалпоғистон Республикасида “Амударё тумангаз” бўлими суюлтирилган газ хизмати чилангари тегишли ҳужжатларсиз ва ёнғин хавфсизлиги қоидаларига зид равишда 104 та газ баллонини сақлаб келгани аниқланган. Сурхондарё вилоятида “Шерободтумангаз” бўлими ҳайдовчиси яшаш хонадонида 25 та, Тошкент вилоятида эса “Қуйичирчиқ тумангаз” бўлими газ тўлдириш шохобчаси ходими 3 та газ баллонини сақлагани қайд этилган.

Шунингдек, Наманган шаҳрида 1986 йилда туғилган фуқаронинг уйидан 20 та, Қашқадарё вилоятининг Касби туманида эса 1974 ва 1996 йилларда туғилган икки фуқаронинг хонадонларидан жами 92 та газ баллони аниқланган. Хоразм вилоятининг Хонқа туманида 1995 йилда туғилган фуқаро умумий овқатланиш шохобчасида аҳолига ажратилган 5 та газ баллонидан ноқонуний фойдалангани ҳужжатлаштирилган.

ДХХ маълумотларига кўра, 20 октябрдан буён республика бўйича жами 370 та ҳолатда 9 455 та газ баллони ноқонуний сақланаётгани аниқланган. Улардаги суюлтирилган газ миқдори 102 минг 158 килограммни ташкил этган.