Ўзбекистонлик модель Роза (исми ўзгартирилган) 2009 йилда АҚШга боргач, моделлик агентлиги томонидан жинсий жиноятларда айбланган молиячи Жеффри Эпстейннинг Флорида штатидаги уйига икки марта фотосессия учун юборилганини маълум қилди. У агентлик раҳбариятини ўз хавфсизлигини таъминламаганликда айблади. Бу ҳақда BBC хабар берди.

Розанинг айтишича, у АҚШга келганидан бир ой ўтиб, MC2 Model Management агентлигининг Америка бўлими томонидан Эпстейннинг Палм-Бичдаги уйига юборилган. Ўша вақтда Эпстейн вояга етмаган шахсга нисбатан жинсий жиноятлари учун қамоқ жазосини ўтаётган бўлса-да, унга кундузи қамоқхонадан ташқарида ишлашга рухсат берилган. Роза агентликнинг ўша пайтдаги АҚШдаги президенти Жефф Фуллер унинг қаерга юборилаётганидан хабардор бўлганини таъкидлаган.

Моделнинг сўзларига кўра, фотосессиялардан кейин Эпстейн уни ёрдамчиси сифатида ишга олган ва мунтазам равишда жинсий зўравонлик қилган. Роза агентлик уни ҳимоя қилиши керак бўлганини, бироқ аксинча, хавф остида қолдирганини билдирган.

BBC журналистлари Жефф Фуллер томонидан Розанинг Палм-Бичдан қайтиш чиптаси бронь қилинганини кўрсатувчи харажатлар ҳисоботини ҳам аниқлаган. Бироқ Фуллер аввалроқ моделнинг Эпстейн уйига боришидан хабари бўлмаганини айтган. У BBC’нинг кейинги саволларига жавоб бермаган.

Суриштирув давомида АҚШ Адлия вазирлиги томонидан эълон қилинган ҳужжатлар ҳам ўрганилган. Уларда MC2 агентлигининг камида 10 нафар модели Эпстейн билан учрашгани ёки алоқада бўлгани қайд этилган. Шунингдек, ҳужжатларга кўра, Эпстейн 2005 йилда агентликка 1 миллион доллар берган. Агентлик эгалари эса икки йил ўтиб, унинг компанияга алоқаси йўқлигини билдирган.

BBC суриштирувида агентлик билан боғлиқ собиқ агент Рамзи Элколли ва директор Фейт Кейтснинг ҳам Эпстейн билан алоқалари ўрганилган. Маълумотларга кўра, Элколли Эпстейнга 34 нафар аёлни таништиришга уринган. Улар орасида мактабда ўқиётган 18 ёшли қиз ҳам бўлган. Кейинчалик ушбу аёл 19 ёшида Эпстейн билан илк учрашувида жинсий тажовузга учраганини айтган. Элколли эса Эпстейннинг жиноий ҳаракатларидан хабари бўлмаганини билдирган.

Суриштирувда Симона (исми ўзгартирилган) исмли яна бир модель ҳам Эпстейн томонидан 200 мартадан ортиқ жинсий зўравонликка учраганини маълум қилган. Унинг айтишича, Эпстейн билан 20 ёшида танишганидан сўнг моделликни ташлаб, унинг ёрдамчисига айланган ва қарийб икки йил давомида молиявий ҳамда шахсий ҳаёти устидан назорат ўрнатилган.

Фейт Кейтснинг адвокатлари эса BBC’га мижозлари Эпстейн томонидан чалғитилганини ва унинг жиноий фаолиятидан хабари бўлмаганини билдирган. Шунингдек, Кейтс моделларга пластик операция қилишни таклиф этмаганини таъкидлаган.

Айни пайтда Нью-Йорк штати сенатори Зелнор Майри Эпстейн жиноятларидан хабардор бўлган ёки хабардор бўлиши керак бўлган шахсларни ҳам жавобгарликка тортиш имкониятини кенгайтирувчи қонун лойиҳасини таклиф қилган.

Роза ўз ҳикоясини ошкор қилиш орқали бошқа жабрланувчиларни ҳам сукут сақламасликка чақирган. Унинг таъкидлашича, ҳозиргача ўзи учун адолат қарор топмаган.