Польша Украина учун АҚШда ишлаб чиқарилган қурол-яроғ ва ҳарбий техникаларни харид қилишга ҳозирча маблағ ажратмайди. Бош вазир Дональд Туск НАТО Бош котиби Марк Рюттега Варшава PURL дастурига молиявий ҳисса қўшмаслигини билдирган. Бу ҳақда “Gazeta.Ru” хабар берди.

Тускнинг айтишича, бундай қарор Польша давлат бюджетидаги катта тақчиллик ва мудофаа харажатлари билан боғлиқ.

Аввалроқ, 6 ноябрь куни Польша ташқи ишлар вазири Радослав Сикорский мамлакат президенти Карол Навротскийнинг Украинага нисбатан шубҳали муносабатда эканини билдирган эди. У президентнинг бу позицияси ўзгариб, АҚШ ва Европа Иттифоқи билан ҳамкорлик йўналиши қайта кўриб чиқилишига умид билдирган.

7 ноябрь куни эса Польша Бош штаби собиқ ўринбосари, генерал Леон Коморнитский Украинани “парчаланиб бораётган давлат” деб атаб, унинг армияси Европа Иттифоқи маблағлари ҳисобидан фаолият юритаётганини таъкидлаган.

Маълумот учун, PURL (Prioritised Ukraine Requirements List) дастури 2025 йил июль ойида НАТО ва АҚШ ҳамкорлигида ишга туширилган. Механизм доирасида Украина зарур қурол-яроғ ва ўқ-дориларга бўлган эҳтиёжини белгилайди, НАТО эса харид пакетларини шакллантиради. Европа давлатлари ва бошқа ҳамкорлар ушбу харидларни молиялаштиради, қуроллар эса АҚШда ишлаб чиқарилиб, НАТО мувофиқлаштируви орқали Украинага етказилади.