Ҳавонинг иссиқ кунларида ҳам оёқ музлаши мумкин, балки бунга дуч келмагандирсиз. Лекин ён-атрофингизда кимнингдир "оёғим музлаяпти", деганини эшитган бўлсангиз керак.

Хўш, оёқлар нима учун музлайди? Нега бошқа тана аъзоси эмас, айнан оёқлар. Мутахассислар фикрига кўра, бир неча касаллик белгилари қаторида оёқнинг музлаши ҳам бор. Лекин инсонлар оёқлари совиши ортидан камдан-кам ҳолатда шифокорга мурожаат қилади. Чунки уни касаллик белгиси сифатида тан олишмайди.

Одамлар иссиққина пайпоқ кийганида ҳам қуйидаги ҳолатлар сабаб оёқлари музлайверади.

– умумий терморегуляция (тана ҳароратини доимо бир хил ушловчи физиологик жараён)нинг бузилиши;

– қон таркибининг ўзгариши;

– қон томир тонусида мунтазамликнинг бузилиши;

– юрак қисқаришида кучнинг камайиши;

– томир урушининг ёмонлашиши.

Шунингдек, аксар беморлар оёқлари музлайдиган дамда бир қанча касалликлар қуршовида қолиши мумкин экан.

Стрессга тушиш

Ўта ҳаяжонли ва стрессли вазиятлар адреналин гормонининг ажралишига олиб келади. Ташхис қўйиш шарт эмас, одатда бемор буни ўзи ҳам сезади. Юрак безовталана бошлайди, тонусни тартибга солишда қийинчилик юз беради. Организм бир ҳолатдан умуман бошқа ҳолатга ўтади. Бу пайтда қон айланиши тезлашиб, қўл ва оёқ учларига қон етиб бормаслиги оқибатида оёқлар совиб кетиши мумкин. Агар стресс пайтида оёқ жароҳатланса, қон кетиши бошқа ҳолатга нисбатан кам эканлиги кузатилган.

Қалқонсимон без фаолиятининг сусайиши (гипотиреоз) - бу жараёнда ёд етишмовчилиги касалликлари кучая боради. Барча алмашинув жараёнлари бузилади. Организмда ёд етишмаслиги айрим мамлакатларда катталар орасида кенг тарқалган. Лекин унинг белгилари бошқа касалликларникига ўхшашлиги туфайли беморлар даво излашда кўп вақт йўқотади. Ушбу касаллик белгилари қаторида оёқ совиши ҳам бор.

Очлик – овқатни бирдан чеклаш модда алмашинувининг пасайишига олиб келади. Бу ўз ўрнида кам ҳаракатни тақозо этади. Ҳаракатсизлик ортидан қон айланиши ҳам доимгидек бўлиши мумкин эмас. Шундай қилиб, умумий ҳарорат тушади, оёқ-қўлларда ҳам совуқлик сақланиб қолади.

Қон таркибида ўзгаришлар рўй бераётган бўлса, дарҳол шифокор кўригидан ўтиш зарур. Камқонлик, оқсил етишмовчилиги, микроэлементлар ҳамда витамин етишмаслиги келажакда организм учун қандайдир хавф туғдириши мумкин. Айнан шу белгиларнинг ўзи ҳам оёқларнинг совуқ бўлишига олиб келади.

Юрак. Юрак етишмовчилиги кўпроқ ёши катта одамларда учрайди, шу туфайли уларда нафас олишда қийинчилик кузатилади. Юрак механикасининг бузилиши насос функциясининг сустлашувига олиб келади ҳамда тананинг барча аъзоларига қон етиб бормайди. Шу ҳолатларда ҳам оёқ ҳарорати сезиларли равишда совийди.

"Бошни совуқ – оёқни иссиқ сақланг!", деган нақл бор. Тана аъзоларида бирор оғриқ ёки ўзгариш сезсангиз, албатта, соғлигингиз учун қайғуринг. Сизга арзимасдек кўринган муаммо, аслида қайсидир касаллик белгисини намоён қилаётган бўлиши мумкин. Касаллик келиши олдидан ўзи сигнал юбориши бу беморлар учун енгилликлар туғдиради, даво топиши ҳам осонроқ кечади.

• Фойдали
• қизиқарли
• саломатлик