Ўзбекистонда Bayraktar дронлари билан бутланган янги махсус бўлинманинг жанговар навбатчилиги йўлга қўйилди. Бу ҳақда Давлат хавфсизлик хизмати раиси Баҳодир Қурбонов президент ҳузуридаги Хавфсизлик кенгашининг 13 январь куни ўтказилган кенгайтирилган йиғилишидаги ахборотида маълум қилди.

Баҳодир Қурбонов, шунингдек, давлат чегарасини қўриқлаш ва ҳимоя қилиш тизимига замонавий рақамли воситаларни жорий этиш жараёнида давлат чегараларининг 42 фоизи видеокузатув тизими билан жиҳозлангани, 1117 километр оптик толали алоқа линиялари ётқизилганини маълум қилди.

ДХХ раисининг сўзларига кўра, Чегара қўшинлари 98 фоизга автозирҳли техника, 88 фоизга сузиш воситалари, 100 фоизга қурол-яроғ ва ўқ-дорилар, 78 фоизга электрон-оптик воситалар билан таъминланган. Бўлинмалар замонавий учувчисиз учиш аппаратлари билан таъминланган.

Шунингдек, жанговар тайёргарлик тадбирларининг шиддати ва сифат кўрсаткичлари оширилган.

• Чегара
• Ўзбекистон
• дрон