Инсоният яратаётган кашфиётлар табиат мувозанатига жиддий таъсир кўрсатмоқда. Шу сабабли, ҳали баҳор тугамай ҳаво ҳарорати 40 даражага яқинлашиб қолди.

Хўш, иссиқ ҳавода қандай касалликлар бош кўтаради? Жазирамадан сизни қандай либослар ҳимоя қилиши мумкин? Нима учун иссиқ кунларда зарарли одатлардан воз кечиш керак? Бу мақола орқали сиз ушбу саволларга жавоб топишингиз мумкин.

Жазирама нимаси билан хавфли?

Ҳавонинг юқори ҳарорати – нафақат турли касалликлардан азият чекувчи инсонлар, балки соғлом одамлар учун ҳам оғир синов.

Иссиқлик организмга катта босим туширади. Бундай ҳолатда организмнинг ҳимоя тизимларидан бири бўлмиш тер ажралиши фаоллашади. Аммо, бунда тер билан бирга организмдан муҳим микроелементлар, фойдали моддалар ҳам чиқиб кетади. Кўп суюқлик йўқотиш оқибатида қон қуюқлашади, бу эса юрак-қонтомир касалликларининг бош кўтаришига олиб келади.

Жазирамада қандай касалликлар кучаяди?

Ҳаво жуда иссиқ бўлгани туфайли организмдаги сурункали касалликлар, юрак-қонтомир, бронхологик, эндокрин касалликлари кучайиб кетади. Бу гипертониклар учун ҳам, гипотониклар учун ҳам хавфли давр.

Иссиқ ҳавода терлаб туриб, яхна ичимликлар истеъмол қилиш ангина, пневмония, пиелонефрит касалликларини келтириб чиқаради.

Жазирамада нималардан сақланиш керак?

Жазирамада тана ҳароратини кўтариб юборадиган ҳар қандай ҳаракатни чеклаш керак. Қуёш тўғридан тўғри тушиб турадиган жойларда кўп қолиб кетманг, оғир жисмоний машқлар билан шуғулланмай туринг. Иссиқ кунда спиртли ичимлик истеъмол қилиш организмга салбий таъсир кўрсатади.

Жазирамада қандай кийиниш керак?

Бу борадаги қоидалар жуда оддий: либосларнинг ёрқин рангдаги, табиий матолардан тайёрланганини танланг. Бундай вақтда синтетик либослар кийиш қон айланиш жараёнининг бузилишига олиб келади. Қуёш уришидан сақланиш учун кўчага чиқишдан аввал бош кийим кийишни унутманг.

• Jazirama
• Об-ҳаво