Экология, атроф-муҳитни муҳофаза қилиш ва иқлим ўзгариши вазирлиги 2025 йил 1 ноябрга қадар пластик чиқиндиларни қисқартириш бўйича халқаро тан олинган механизмларни назарда тутувчи қонун лойиҳасини ишлаб чиқади.

Ҳужжат пластик қадоқлар ёки пластик қадоқларда маҳсулот ишлаб чиқарувчи ҳамда импорт қилувчиларга нисбатан “тараларни қайтариш”, фуқароларга чиқиндиларни қабул қилувчи махсус ускуналарга топширилган ҳар бир пластик идиш учун тўлов қилиш имкониятини яратиш каби мажбуриятлар жорий қилишни назарда тутади.

Ўзбекистонда йилига 10,2 млн тонна чиқинди ҳосил бўлиб, унинг 10,3 фоизи пластмассадан иборат. 2022 йилда пластик ҳажми 2013 йилга нисбатан 2,5 бараварга ошган. Экология вазирлиги ўтказган инвентаризация маълумотларига кўра, пластмассанинг энг йирик истеъмолчилари қадоқлаш, транспорт ва қурилишдир.

Республиканинг деярли ҳар бир ҳудудида пластмасса буюмлари, жумладан, идиш-товоқ ва қоп ишлаб чиқарувчи корхоналар мавжуд. Бундан ташқари, мамлакатга пластик маҳсулотлар импорти экспортдан сезиларли даражада ошиб, 2023 йилда 158,5 минг тоннани, 487,5 млн долларни ташкил этган.

Ҳисоботда пластик чиқиндиларни самарали бошқариш учун инфратузилмани ривожлантириш зарурлигини таъкидланган. Айниқса, полиэтилен, полипропилен ва ПЕТ учун қайта ишлаш корхоналари сонининг кўпайиши чиқинди полигонларига ташланадиган чиқиндилар ҳажмини сезиларли даражада камайтиради ва қайта ишлашнинг иқтисодий рентабеллигини оширади.

• Чиқинди
• Экология
• Plastik idish
• Вазирлик
• Янгилик