“Ўзбекистон элчиси (қароргоҳи Сингапур шаҳрида) Алишер Қаюмов кеча Австралия Генерал-губернатори Саманта Мостинга ишонч ёрлиқларини топширди”, деб хабар бермоқда “Дунё” агентлиги.

Расмий маросим Канберра шаҳрининг “Говернмент House” резиденциясида бўлиб ўтди.

Австралия Генерал-губернатори билан суҳбат давомида сўнгги йилларда тобора ривожланиб бораётган Ўзбекистон-Австралия муносабатларининг бугунги ҳолати ва истиқболлари, жумладан сиёсий, савдо-иқтисодий, илм-фан, таълим ва бошқа соҳалардаги ҳамкорлик масалалари батафсил муҳокама қилинган.

Саманта Мостин Ўзбекистон Президенти Шавкат Мирзиёев раҳбарлигида амалга оширилаётган кенг кўламли ислоҳотларни юқори баҳолаб, давлат бошқаруви тизимини модернизация қилиш, фуқаролик жамиятини ривожлантириш ва халқаро бизнес учун қулай инвестиция муҳитини яратиш борасида эришилган натижаларни алоҳида қайд этган.

Австралия ва Ўзбекистон иқтисодиёти ўртасидаги ўхшашликлар, хусусан, пахтачилик ва тоғ-конь саноати соҳалари муҳим роль ўйнаши қайд этилиб, бу инновация ва инвестициялар йўналишларида ўзаро ҳамкорлик учун кенг истиқболларни яратиши таъкидланган.

Шунингдек, Генерал-губернатор яқинда Самарқандда бўлиб ўтган ЮНЕСКО бош конференцияси муваффақиятли ўтказилганини таъкидлаб, австралиялик туристлар учун Ўзбекистон тобора жозибадор йўналишга айланаётганини билдирди.

Суҳбат якунида Саманта Мостин икки томонлама муносабатларни янада мустаҳкамлашга тайёрлигини билдириб, Ўзбекистон раҳбарияти ва халқига самимий тилакларини етказди.

Маълумот учун, Алишер Қаюмов Ўзбекистоннинг Сингапурдаги (2018-2024) ва Австралияда (2022-2024) ўриндошлик асосидаги элчиси (қароргоҳи Сингапурда) бўлиб ишлаган Қаҳрамон Шокиров ўрнига тайинланган. 2024 йил 30 апрель куни Алишер Қаюмов Сингапур Президенти Тарман Шанмугаратнамга ишонч ёрлиқларини топширган эди.

• Австралия
• Элчи
• Ўзбекистон