Тошкент шаҳридаги “Брассериэ Парк” ресторани олдида 17 ёшли курер билан жанжаллашиб, уни ҳақорат қилган эркак 5 суткага маъмурий қамоққа олинди. Бу ҳақда ҚАЛАМПИР.УЗ суд ҳужжатларига таяниб хабар берди.

Суд ҳужжатларига кўра, ҳодиса 17-октябрь куни соат 15:30 атрофида Ислом Каримов кўчасида жойлашган ресторан олдида содир бўлган. “ОНЕ МОРЕ” МЧЖда ҳайдовчи бўлиб ишлайдиган С.Р. скутерда ҳаракатланаётган курерга бу ҳудудда юрмаслиги кераклигини айтган. Келиб чиққан келишмовчилик ортидан у курерни ҳақорат қилган.

Воқеа акс этган видео ижтимоий тармоқларда тарқалиб, кенг муҳокамаларга сабаб бўлган. Видеода ресторан ходими курернинг ҳудудга скутерда кириб келиши мижозларга халақит бераётганини айтиб, уни ҳақорат қилгани акс этган. Шундан сўнг “Мовий гумбазлар” хиёбонида жойлашган ресторан ёзги майдончасида қонунбузилишлар аниқланиб, ҳудуд қонунчилик талабларига мувофиқлаштирилган.

Суд мажлисида С.Р. айбига қисман иқрор бўлиб, жаҳл устида курерни сўкканини тан олган ва қилмишидан пушаймонлигини билдирган. Суд унинг ҳаракатларини Маъмурий жавобгарлик тўғрисидаги кодекснинг 183-моддаси — майда безорилик деб баҳолаб, 5 сутка маъмурий қамоқ жазоси тайинлаган.

Ички ишлар ходимларининг қонуний талабларига бўйсунмаслик ва ҳақорат қилиш бўйича айбловлар тегишли далиллар билан тасдиқланмагани сабабли ишнинг ушбу қисмлари тугатилган. Шунингдек, С.Р.дан махсус қабулхонада сақлаш харажатлари учун 330 минг сўм ундириш белгиланган.