“Озодлик Радиоси” Ўзбекистонда аккредитациядан ўтказилиши мумкин. Бу борада жорий йил 31 май куни АОКА директори Асаджон Ходжаев, “Озод Европа Радиоси / Озодлик Радиоси” медиа корпорацияси президенти Жейми Флай ва медиа-корпорация вакили Паҳлавон Турғунов учрашувида гап борган.

Мулоқот давомида Агентлик фаолиятининг асосий йўналишлари, Ўзбекистонда ахборот соҳасини либераллаштириш, сўз ва матбуот эркинлиги ҳамда давлат идоралари очиқлигини таъминлаш борасида олиб борилаётган ислоҳотлар тўғрисида маълумот берилди.

Мулоқот давомида “Озодлик Радиоси” медиа корпорацияси вакилларини республикада аккредитациядан ўтказиш масаласи ҳам муҳокама этилди. Икки томон аккредитация билан боғлиқ масалаларни навбатдаги учрашувларда кўриб чиқишга келишиб олишди.

Томонлар учрашувда, шунингдек, ўзаро мавжуд масалалар, уларни ҳал этиш йўллари, шу жумладан “Озодлик Радиоси” таҳририяти томонидан тайёрланаётган ва чоп этилаётган материалларнинг Ўзбекистон қонунчилиги ва журналист этикаси меъёрларига мос келиши юзасидан ўз мулоҳазаларини билдиришган ва ушбу масалаларни бартараф этиш борасида босиб ўтилиши мумкин бўлган қадамлар ҳақида фикр алмашишган.

Маълумот учун, ўша куни сиёсатшунос К.Раббимов ҳам “Озодлик” радиокорпорацияси президенти ва бир қанча ватандошлик жамияти вакиллари билан бўлиб ўтган учрашув ҳақида маълумот бериб, Жемие Флайнинг қуйидаги сўзларини иқтибос келтирган эди:

“Озодлик радиоси Ўзбекистонда расман рўйхатдан ўтса-ўтмаса, бизнинг ахборот олиш ва тарқатиш салоҳиятимиз ўзгармайди, яъни, ошиб кетмайди. Биз қандай маълумот олиб тарқатаётган бўлсак, шундай тарқатаверамиз. Рўйхатдан ўтиш, бизга қандайдир таъсир қилса – бу давлатнинг биз билан расман мулоқот қилиш, таъсир қилиш имконияти пайдо бўлади. Аслида, бундан Ўзбекистонни ўзи манфаатдор бўлиши керак. Лекин, ҳозирча Ўзбекистон томони “негатив ахборот кўп, позитив кам” деган позицияда турибди”.

• АОКА
• Аккредитация
• Озодлик радиоси