Тошкент шаҳар судлари блогер Комила Абдуқодирова (“Кокош”), актриса Барчин Ғофурова ва блогер Ниҳола Ражабовага нисбатан чиқарилган суд ҳукми юзасидан расмий изоҳ берди. Апелляция инстанцияси уларни туҳмат ва товламачиликда айбдор деб топиб, 3 йил 6 ойдан 4 йил 6 ойгача озодликдан маҳрум этган эди.
Суд изоҳида таъкидланишича, жарроҳлик амалиёти оқибатида ўзига моддий ва маънавий зарар етказилган деб ҳисоблаган шахс қонуний тартибда ваколатли органларга мурожаат қилиши мумкин. Бироқ масалани қонунда тақиқланган усуллар билан ҳал қилишга уриниш жиддий ҳуқуқий оқибатларга олиб келади.
Судларнинг қайд этишича, Комила Абдуқодирова ва унинг ҳамроҳлари клиника раҳбарига нисбатан туҳматли видеолар тарқатган ҳамда уларга моддий манфаат эвазига ушбу видеоларни ўчириш ва клиника обрўсини тиклашни таклиф қилган. Улар клиника раҳбаридан Абдуқодированинг Туркиядаги хусусий клиникада қўшимча даволаниши учун 35 минг доллар талаб қилган.
Суд материалларига кўра, можаро 2025 йил март ойида Комила Абдуқодированинг Тошкентдаги “Med Consultant” хусусий клиникасида липосаксия ва абдоминопластика амалиётларини ўтказганидан кейин бошланган. Жарроҳликдан сўнг унда некроз жараёни кузатилган. Суд ҳужжатларида бемор шифокорлар тавсияларига, жумладан, реабилитация ва ётоқ режимига тўлиқ риоя қилмагани ҳам қайд этилган.
Шундан кейин судланувчилар Instagram саҳифаларида клиника шифокорларини айбловчи ва ҳақоратли видеолар жойлаштирган. Улар эса суд мажлисида ўз айбларига иқрор бўлмаган. Жабрланувчи У.А. дастлабки терговдаги кўрсатмаларини тасдиқлаб, судланувчиларга қонуний жазо тайинлашни сўраган.
2025 йил 13 ноябрь куни апелляция инстанцияси Комила Абдуқодировани Жиноят кодексининг 140-моддаси 3-қисми “а” банди ва 165-моддаси 3-қисми “а” бандида назарда тутилган жиноятларни содир этганликда айбдор деб топиб, унга 3 йил 6 ой, Барчин Ғофуровага 4 йил, Ниҳола Ражабовага эса 4 йил 6 ой озодликдан маҳрум қилиш жазосини тайинлаган. Жазони умумий тартибли колонияларда ўташ белгиланган.
Тошкент шаҳар судлари биринчи инстанция ҳукмининг апелляция тартибида бекор қилиниши ва жазоларнинг ўзгартирилиши одил судлов жараёнининг бир қисми эканини билдирди. Шунингдек, судланувчиларда апелляция инстанцияси ҳукми устидан шикоят қилиш ҳуқуқи мавжудлиги эслатилди.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!