Президент Мирзиёев Ўзбекистон Қаҳрамони Лола Муротованинг вафоти муносабати билан таъзия билдирди.

“Мамлакатимиз қишлоқ хўжалиги оғир жудоликка учради.

Машҳур фермер, Фарғона вилоятининг Олтиариқ туманидаги “Нурли обод” фермер хўжалиги раҳбари, Ўзбекистон Қаҳрамони, Ўзбекистон Республикаси Олий Мажлиси Сенати аъзоси, таниқли жамоат арбоби Лолахон Муротова оғир касалликдан сўнг шу йил 30 май куни 64 ёшида вафот этди”, – дейилади таъзияномада.

Шунингдек, таъкидланишича, бутун мамлакатнинг ғурур ва ифтихори бўлган Лолахон Муротова 1958 йил 9 мартда Фарғона вилоятининг Олтиариқ туманида туғилган. Ўрта мактабни тугатганидан сўнг меҳнат фаолиятини Олтиариқ туманидаги “Нуробод” жамоа хўжалигида механизатор сифатида бошлаган, ўз ҳаётини мамлакат иқтисодиётининг етакчи тармоғи бўлган қишлоқ хўжалиги билан боғлаган.

Ёшлик йилларидан бошлаб деҳқончилик илмини пухта ўрганган Л. Муротова жамоа хўжалигида бош пудратчи, бўлим бошлиғи, хўжалик раиси каби лавозимларда фидокорона меҳнат қилиб, ишни ташкил этиш, мўл ҳосил етиштириш, хўжаликни самарали бошқариш соҳасида катта тажриба орттирган.

Фермерлик ҳаракатига кенг йўл очилиши билан моҳир ва миришкор деҳқон мамлакатимизда биринчилардан бўлиб “Нурли обод” фермер хўжалигига асос солди ҳамда ернинг ҳақиқий эгаси сифатида юртимизда фермерлик ҳаракатини ривожлантириш ва уни янги босқичга кўтаришга катта ҳисса қўшган.

“Ўз фаолиятида доимо янгиликка интилиб, эзгу ташаббуслари билан барча фермерларга, айниқса, ёшларга ибрат бўлиб яшаган Л.Муротова Янги Ўзбекистон шароитида алоҳида жонбозлик ва ғайрат-шижоат кўрсатиб ишлади. Қишлоқ хўжалиги соҳасида илғор агротехнологияларни, бошқарувнинг замонавий усуллари ва самарали воситаларини қўллаш, ер ва сув ресурсларидан оқилона фойдаланиш, ёш фермерлар авлодини тарбиялашда ўзига хос тажриба мактабини яратди.

У ўз фолияти билан Ватанга муҳаббат ва садоқатнинг, касбига фидоийликнинг ҳақиқий намунасини намоён этди. Айнан ана шундай олижаноб фазилатлари билан Лолахон опа бутун халқимиз учун ўзбек аёлининг ҳақиқий тимсолига айланди”, – дейилади ҳамдардлик хатида.

Таъзияномада, шунингдек, Лола Муротованинг жамоат ишларида ҳам фаол иштирок этгани, унинг бу борадаги серқирра фаолияти ёшларни, хотин-қизларни замонавий касб-ҳунарларга ўргатиш, уларни иш билан таъминлаш, ҳаётда ўз ўрнини топишида яқиндан кўмак бериш, эҳтиёжманд оилаларни ҳар томонлама қўллаб-қувватлаш, қишлоқ ва маҳаллаларни обод этиш, аҳоли турмуш шароитини яхшилашга қаратилган эзгу ишларида яққол намоён бўлгани таъкидланади.

“Атоқли фермер, қишлоқ хўжалиги илмининг етук намояндаси, таниқли жамоат арбоби, ёшларнинг меҳрибон устози, камтарин ва самимий инсон, халқимизнинг фидойи фарзанди Лолахон Муродованинг ёрқин хотираси қалбларимизда ҳамиша сақланиб қолади”, – дейилади Ўзбекистон Президенти Ш. Мирзиёев, Сенат Раиси Т.Норбоева, Қонунчилик палатаси Спикери Н.Исмоилов, Бош вазир А.Арипов, Бош вазир ўринбосари Ш.Ғаниев, Фарғона вилояти ҳокими Х.Бозоров ҳамда ЎзЛиДеП раҳбари А.Ҳайитовлар имзолаган таъзияномада.

• Президент
• Қаҳрамон
• Таъзия