Тошкент вилоятининг Бўка туманида қариндоши ва ҳамкасбига қарши сохта айбловлар уюштириб, уларнинг судланишига сабаб бўлган 58 ёшли эркак 9 йилга озодликдан маҳрум этилди. У билан бирга яна беш киши ҳам судланган.
Суд материалларига кўра, хусусий корхона раҳбари бўлган Д.Н. қариндоши Д.З. билан ер масаласида келишмовчиликка борган. Шундан сўнг у Д.З.нинг 2011 йилларда кредитга кафиллик учун имзолаб, муҳр босиб берган оқ қоғозларидан фойдаланган. Уларга 2020 йилда гўёки 360 миллион ва 342 миллион сўм қарз олингани ҳақида сохта ёзувлар киритиб, жами 702 миллион сўмлик тилхатлар тайёрлаган.
Д.Н. ушбу ҳужжатларни 2022 йил августида Бўка туман прокуратурасига тақдим этган. Сохта айбловни тасдиқлаш учун айрим гувоҳларга пул ваъда қилинган. Жумладан, С.Р.га 40 миллион, Р.Ғ.га эса 10 миллион сўм таклиф этилган. С.Р. воқеани кўрмаган бўлса-да, пул бериш жараёнини батафсил тасвирлаб, ёлғон кўрсатма берган. Ваъда қилинган маблағнинг 6,6 миллион сўми унга берилган.
Тилхатлар бўйича ўтказилган дастлабки экспертиза Д.З. ва унинг рафиқасини ёзувларни ёзган деб топган. 2023 йил 23 январда Бўка туман суди уларни айбдор деб топган. Натижада Д.Н. Д.З.нинг қизи номидаги 452 миллион сўмлик хонадон ва 102 миллион сўмлик Damas автомобилини ўзига ўтказиб олган. Яна 148 миллион сўм депозит ҳисобварағи орқали ундирилган.
Бироқ иш Олий судда қайта кўриб чиқилиб, комиссиявий хатшунослик экспертизаси тайинланган. 2025 йил 5 декабрдаги хулосага кўра, қарз ҳақидаги ёзувларни Д.З. ҳам, унинг рафиқаси ҳам ёзмаган. Аввалги икки экспертиза хулосаси илмий асосланмаган деб топилган. 2025 йил 19 декабрда Олий суд Д.З.га нисбатан чиқарилган суд қарорларини бекор қилиб, уни оқлаган.
Д.Н. 2023 йил октабрида ҳамкасби А.Р.га қарши ҳам 15 минг доллар қарз олгани ҳақида ёлғон ариза билан мурожаат қилган. Бу ишда ҳам гувоҳлар пул ёки қарздан озод қилиш эвазига ёлғон кўрсатма берган. 2024 йил 20 августда А.Р. фирибгарликда айбдор деб топилган, бироқ иш қайта кўриб чиқилиб, 2025 йил 20 мартда Тошкент вилоят суди уни оқлаган.
Маълумотларга кўра, Д.Н. билан бирга яна беш киши судланган. Уларнинг тўрт нафари жабрланувчиларга қарши пул ёки бошқа манфаат эвазига ёлғон гувоҳлик берган. ИИВ ҳузуридаги Эксперт-криминалистика маркази бош эксперти Э.К. эса етарли ёзув намуналари бўлмаган ҳолда асоссиз экспертиза хулосаси берган.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!