Рақобатни ривожлантириш ва истеъмолчилар ҳуқуқларини ҳимоя қилиш қўмитаси пропан нархининг асоссиз оширилишига қарши чораларни кучайтирмоқда. Бу ҳақда қўмита матбуот хизмати маълум қилди.

Хабарда қайд этилишича, 2025 йилнинг ноябрь–декабрь ойларида бозор иштирокчиларига ушбу даврда метан газига жорий этилган вақтинчалик чекловлардан фойдаланиб, суюлтирилган газ нархларини асоссиз оширмаслик бўйича профилактик мақсадда огоҳлантиришлар юборилган.

Шунга қарамай, айрим хўжалик юритувчи субъектлар томонидан адолатли бозор тамойилларига зид равишда нархларнинг сунъий оширилишига олиб келувчи манипуляция ва мувофиқлаштирилган ҳаракатлар аломатлари аниқланган.

Мазкур ҳолатлар юзасидан қўмита томонидан белгиланган тартибда қонунбузилиш аломатлари бўйича иш қўзғатиш жараёнлари бошланган.

Бундан ташқари, биржа савдоларида нархларни барқарорлаштириш мақсадида “корректировкаловчи” чоралар кўрилиб, бозор иштирокчиларига маҳсулотларни биржа савдоларига тўлиқ ҳажмда ва узлуксиз чиқариш бўйича кўрсатмалар берилди.

• Газ
• Нарх-наво