Президент Шавкат Мирзиёев қурилиш материаллари саноатидаги натижалар ва янги экспорт имкониятларига тўхталиб, яқин йилларда соҳа экспортини 5 миллиард долларга етказиш мумкинлигини таъкидлади. Бу ҳақда давлат раҳбарининг матбуот хизмати хабар берди.
Қайд этилишича, сўнгги 10 йилда қурилиш материаллари саноатига 12 миллиард доллар инвестиция киритилган ва 5 мингдан зиёд замонавий корхона ишга туширилган. Жорий йилда ишлаб чиқариш ҳажми 2016 йилдаги 7 триллион сўмдан 65 триллион сўмга, экспорт эса 75 миллион доллардан 1,5 миллиард долларга етиши кутилмоқда.
Мамлакатда ҳар йили 50–55 миллиард доллар инвестиция жалб қилинаётгани қурилиш материаллари учун катта ички бозорни шакллантирмоқда. Шунингдек, қўшни ва яқин минтақаларда ушбу маҳсулотларга бўлган йиллик талаб 50 миллиард долларга баҳоланмоқда.
Президент экспорт ҳажмини ошириш учун юқори қўшилган қийматли маҳсулотлар ишлаб чиқаришни кенгайтириш, маҳаллий девелоперларни хорижий тендерларда иштирок этишга жалб қилиш ҳамда арзон ва узлуксиз логистика занжирларини яратиш зарурлигини қайд этди.
“Лекин ҳозирги тез ўзгарувчан бозор шароитида тадбиркорлар билан йилда бир эмас, керак бўлса, ҳар ойда мулоқот қилиш зарур”, — деди давлат раҳбари.
Мазкур йўналишда вазирлар, тармоқ раҳбарлари ва ҳокимлар олдига аниқ вазифалар қўйилди.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!