Ўзбекистонда аҳоли ва тадбиркорларнинг нақд пул олиш ҳуқуқини кафолатловчи янги тартиб жорий этилади. Унга кўра, банклар фуқаролар ва тадбиркорларнинг ҳисобварақларидаги мавжуд маблағлар доирасида нақд пул олиш бўйича талабларини биринчи мурожаатдаёқ узлуксиз қондириши шарт.
Янги йўриқномага мувофиқ, банклар муомаладаги нақд пулларни номинал қиймати бўйича тўсиқсиз қабул қилади. Шунингдек, банкоматлар мунтазам нақд пул билан таъминланиши, мижозларнинг нақд пулга бўлган эҳтиёжи доимий таҳлил қилиб борилиши керак. Пул етишмаслиги кутилган ҳолатларда банклар қўшимча маблағ жалб қилиш чораларини кўради.
Бундан ташқари, Марказий банк ва тижорат банклари бир номиналдаги пул белгиларини бошқасига ҳеч қандай тўлов ёки воситачилик ҳақисиз алмаштириб беради. Янги банкнот ва тангалар муомалага чиқарилишидан камида бир ҳафта олдин аҳоли бу ҳақда хабардор қилинади.
Янги тартибга кўра, банклар ўртасида нақд пул тақсимоти ҳам электрон шаклда амалга оширилади. Бунда ортиқча нақд пулга эга банклар уни махсус электрон платформа орқали бошқа банкларга таклиф қилади, эҳтиёжи бор банклар эса талабнома юборади. Маблағлар инкассация хизмати орқали етказилади.
Йўриқнома 2027 йил 2 февралдан кучга киради. Шу санадан бошлаб амалдаги тартиб ўз кучини йўқотади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!