Қашқадарё вилоятининг Қарши шаҳрида ҳуқуқ фаоли Жавоҳир Мўминовга нисбатан қийноқ қўллангани ҳақида даъволар янгради. Бу ҳақда “Эзгулик” инсон ҳуқуқлари жамияти раиси Абдураҳмон Ташанов маълум қилди.

Унинг таъкидлашича, Жавоҳир Мўминов Қарши шаҳар ички ишлар бошқармасида бошига қоп кийдирилган ҳолда калтакланган ва қийноққа солинган. Шунингдек, воқеадан сўнг унга тез тиббий ёрдам чақирилгани айтилмоқда.

Ташановнинг билдиришича, ҳуқуқ фаолининг ҳимоячиси сифатида иштирок этган адвокат Лазизжон Шарипов ҳам тан жароҳати олган. Мазкур ҳолат юзасидан суд-тиббий экспертиза тайинлангани маълум қилинган.

Эълон қилинган ҳужжатларга кўра, Қарши шаҳар прокуратураси адвокатнинг тан жароҳатлари бўйича экспертиза ўтказишни белгилаган. Унда жароҳатларнинг мавжудлиги, оғирлик даражаси ва келиб чиқиш сабаблари аниқланиши кўзда тутилган

Абдураҳмон Ташановнинг фикрича, адвокат бўйича экспертиза тайинланган бўлса-да, Жавоҳир Мўминовга нисбатан қўллангани айтилган қийноқлар юзасидан текширувлар етарли даражада олиб борилмаяпти. Унинг маълум қилишича, ҳолат ҳақида Ўзбекистон Омбудсмани ҳам хабардор қилинган.

Жавоҳир Мўминов аввалроқ товламачилик айблови билан ҳибсга олинган эди. “Эзгулик” жамияти эса унга қўйилган айбловларни рад этиб, ҳибсга олиниши ҳуқуқ ҳимояси фаолияти билан боғлиқ эканини таъкидлаб келмоқда.

Айни пайтда ҳуқуқни муҳофаза қилувчи органлар ва бошқа расмий идоралар мазкур даъволар юзасидан расмий муносабат билдирмаган. Шу боис келтирилган маълумотлар ҳозирча даъво ва баёнотлар сифатида қолмоқда.