Эронда беш ой ичида илк бор Можтабо Хоманаий тасвирланган кадрлар намойиш этилди

Эроннинг «Меҳр» давлат агентлиги март ойида олий раҳбар лавозимига тайинланганидан бери илк бор Можтабо Хоманаий акс этган видеони эълон қилди.

Видеода Хоманаий бир неча киши қуршовида ўтиргани кўрилади. Видео қачон тасвирга олингани аниқ эмас.

Можтабо Хоманаий март ойи бошида, ҳарбий операциянинг дастлабки кунларида АҚШ ва Исроил зарбаси оқибатида отаси Али Хоманаий ҳалок бўлганидан сўнг Эроннинг олий раҳбарига айланган. Али Хоманаий мамлакатни 36 йил бошқарган. Ҳужум вақтида Можтабо Хоманаийнинг ўзи ҳам жароҳат олган ва шундан кейин жамоат олдида кўриниш бермаган.

«Тҳе Times» газетаси июль ойи охирида Исроилнинг «Моссад» разведка хизмати ва АҚШ Марказий разведка бошқармаси Эроннинг олий раҳбарини биргаликда қидираётгани ҳақида хабар берган. Улар Хоманаийнинг тирик ёки тирик эмаслигини ва қаерда бўлиши мумкинлигини аниқлашга уринган. Газетанинг таъкидлашича, разведка ҳамжамиятининг айрим вакиллари уни вафот этган бўлиши мумкин, деб ҳисоблаган. Эрон Ислом инқилоби қўриқчилари корпуси эса АҚШ билан уруш бўйича қарорларни қонунийлаштириш учун унинг тириклигини намойиш қилаётган бўлиши мумкинлиги ҳақида ҳам тахминлар билдирилган.

Шу билан бирга, Можтабо Хоманаий омма олдида кўринмаганига қарамай, ижтимоий тармоқларда унинг номидан хабарлар тарқатилган. Жумладан, 26 июль куни Эрон олий раҳбарининг Х ижтимоий тармоғида Ливаннинг ҳудудий яхлитлигини қўллаб-қувватловчи ва Исроил агрессиясига қарши баёнот пайдо бўлган.

Май ойида «Ал Araby» телеканали Эрон ҳукумати йиғилишлари координатори Мазоҳир Ҳусайнийга таяниб, ҳаво ҳужуми оқибатида Можтабо Хоманаий олган жароҳатлар деярли битгани ҳақида хабар берган. Эронлик амалдорнинг айтишича, портлаш тўлқини таъсирида Можтабо Хоманаий йиқилиб, тиззаси ва белидан жароҳат олган, шунингдек, қулоғи ортида кичик кесик пайдо бўлган.

Амалдор олий раҳбарнинг соғлиғига ҳеч қандай хавф йўқлигини таъкидлаган. Унинг айтишича, «душман томонлар олий раҳбарга зарба бериш учун унинг тасвирлари ёки у ҳақида маълумот олишга ҳаракат қилмоқда».

«Тҳе New York Times» газетаси апрель ойи охирида эронлик амалдорга таяниб, резиденцияга қилинган зарбадан кейин Можтабо Хоманаийнинг бир оёғида уч марта операция ўтказилгани ва унга протез қўйилиши режалаштирилаётгани ҳақида хабар берган.

Амалдорнинг қўшимча қилишича, олган жароҳатларига қарамай, кичик Хоманаийнинг ақлий ҳолати яхши ва у фаоллигини сақлаб қолган.