Ҳудудларда ва хорижий давлатларда рўйхатдан ўтган автомобиллар Қирғизистон пойтахти Бишкек шаҳрига кириш учун пул тўлайди. Бу ҳақда “24 kg” нашри хабар берди.

Қайд этилишича, Қирғизистон пойтахти Бишкек шаҳри маъмурияти автотранспорт воситаларининг кириши учун йиғим жорий этишни таклиф қилувчи қарор лойиҳасини ишлаб чиққан.

Қарор лойиҳаси маъқулланса, шаҳар маъмурияти томонидан йўлларда йиғим қабул қилувчи пунктлар ташкил этилади ёки автоматлаштирилган тўлов тизимлари ўрнатилади. 1 минг қирғиз соми миқдорида аванс тўлаган ҳайдовчиларга 30 фоизлик чегирма берилади.

Ҳудудларда ва хорижий давлатларда рўйхатдан ўтган автомобиллар қуйидаги ҳолларда йиғим тўлашдан озод этилиши мумкин:

— табиий офатлар оқибатларини бартараф этиш учун мўлжалланган юкларни ташиш;

— хорижий давлатларнинг дипломатик ваколатхоналари ва консуллик муассасаларига, халқаро ташкилотларга ва уларнинг филиалларига тегишли бўлиши;

— техник ёки ёнғинга қарши хизматларга, тез ёрдамга ва бошқаларга тегишли;

— давлат органларига тегишли.

Мазкур лойиҳада Бишкек шаҳри йўлларига кирмасдан умумий фойдаланишдаги йўлларда ҳаракатланаётганда йиғим олинмаслиги айтилган.

Шаҳарда рўйхатдан ўтган, лекин норезидент давлат рақами бўлган автомашиналарига эга бўлган шахсларга автомобилларини қайта рўйхатдан ўтказиш учун 10 кун муддат берилади.

• Қирғизистон