Қирғизистонда президентлик сайловларини ўтказиш санаси ўзгартирилди. Жогорку Кенеш регламентига киритилган тузатишга кўра, аввал белгиланган октябрь ойининг учинчи якшанбаси ўрнига президентлик сайловлари январь ойининг тўртинчи чоршанбасида ўтказилади.

Тегишли ўзгартиришни Қирғизистон Президенти Садир Жапаров имзолаган. Тузатиш парламент регламентининг 132-моддасига киритилди.

Қайд этилишича, сайлов санаси аввалроқ президентлик сайловлари тўғрисидаги конститутсиявий қонунда ҳам ўзгартирилган. Бироқ Жогорку Кенеш регламентида эски тартиб сақланиб қолган эди. Янги тузатиш орқали икки ҳужжатдаги нормалар ўзаро мувофиқлаштирилди.

Амалдаги қонунчиликка кўра, навбатдаги президентлик сайлови амалдаги давлат раҳбарининг ваколат муддати тугайдиган йилнинг январь ойидаги тўртинчи чоршанбасида ўтказилади. Ушбу тартибга мувофиқ, Қирғизистонда навбатдаги президентлик сайлови 2027-йил 27-январь, чоршанба куни бўлиб ўтади.

Парламент сайловни овоз бериш кунига камида тўрт ой қолганда тайинлаши керак.

Маълумот учун, Қирғизистонда охирги президентлик сайлови 2021-йил 10-январь куни муддатидан олдин ўтказилган. Сайлов 2020-йилги парламент сайловларидан кейинги сиёсий инқироз ҳамда ўша пайтдаги президент Сооронбай Жеэнбековнинг истеъфосидан сўнг ташкил этилган.

Ўша сайловда Садир Жапаров 79,2 фоиз овоз билан президент этиб сайланган. Сайловчиларнинг 39,7 фоизи овоз беришда қатнашган.