Жорий йил, 11 февралда «Skeyt Oʻzbekiston» ассоциацияси расман давлат рўйхатидан ўтди.

Қайд этиш мумкин, Ўзбекистонда скейтбординг ва роллер спорт турларини ривожлантириш мақсадида 2021 йил 9 ноябрь куни «Скейт Ўзбекистон» ассоциациясини таъсис этиш бўйича ташаббускор гуруҳнинг таъсис Конференцияси ўтказилган эди.

Соҳа мутахассислари, «Скейт Ўзбекистон» ассоциациясини ташкил этиш учун ташаббускорлар гуруҳи ҳамда МОҚ вакиллари иштирок этган конференцияда:

- «Skeyt Oʻzbekiston» ассоциацияси номи билан янги спорт ташкилотини тузиш;

- «Skeyt Oʻzbekiston» ассоциациясининг Уставини тасдиқлаш;

- «Skeyt Oʻzbekiston» ассоциациясининг раиси, ўринбосарлари ва бош котибни сайлаш.

Шундан сўнг, ассоциация раиси этиб бир овоздан Аҳмедов Азиз Ғайратович ҳамда бош котиб этиб Усмонов Камол Ҳошим ўғли сайланган.

Бугунги кунда замонавий Олимпия ўйинларининг 28 та спорт тури бўйича 42 та йўналиши Ўзбекистонда мавжуд.

Скейтбордингнинг ватани АҚШ ҳисобланиб, «American Sports Data» маълумотларига кўра, бугунги кунда дунё бўйича 23 миллиондан ортиқ ёшлар скейтбординг ва роллер спорт турлари билан мунтазам равишда шуғулланиб келмоқда.

Скейтбординг қатнашчиларининг сони бўйича дунёда энг машҳур спорт турлари орасида 6-ўринни эгаллайди. 2020 йилдан бошлаб у ёзги Олимпия ўйинлари дастурига расман киритилди.

Роллер спорти эса бир нечта спорт турининг умумий номи бўлиб, бунда спортчи роликли конькидан фойдаланади. Ўз навбатида, у Осиё ўйинлари дастурига киритилган, ушбу спорт турини ҳам ёзги Олимпия ўйинлари дастурига киритиш бўйича амалий чоралар бошлаб юборилган.

Айни пайтга келиб “World Skate» ассоциацияси таркибига 160 дан ортиқ давлат аъзо сифатида кирган ва ҳозир ҳам фаолият олиб бормоқда. Аҳамиятлиси, бугунги кунда Ўзбекистон ва “World Skate» ассоциацияси ўртасида ҳамкорлик алоқалари йўлга қўйилган.

Маълумот учун, 2021 йилда скейтбордингнинг икки йўналиши Токио-2020 ёзги Олимпия ўйинлари дастурига киритилди. Ушбу спорт тури 2024 йилда Парижда бўлиб ўтадиган ёзги Олимпия ўйинлари дастуридан ҳам жой олган.

Собиқ Иттифоқ мамлакатлари орасида скейтбординг ва роллер спорти федерациялари фақат Арманистон, Озарбайжон, Беларус, Грузия, Қозоғистон, Молдова, Россия ва Украинада очилган экан. Энди улар сафига Ўзбекистон ҳам қўшилди.

Маълум қилинишича, бугунги кунда замонавий Олимпия ўйинларининг 28 та спорт тури бўйича 42 та йўналиши Ўзбекистонда мавжуд бўлиб, фақатгина иккита спорт тури, яъни Скейтбординг ва Сёрфинг республика рўйхатидан ўтмаган.

• Ассоциация
• Ўзбекистон
• Спорт