“Реал Мадрид” клуби мулкчилик тузилмасини ўзгартириш бўйича музокаралар олиб бормоқда. Voz Populi’нинг хабар беришича, Sixth Street инвестиция компанияси ва LVMH раҳбари Бернард Арно клуб улушини харид қилишга қизиқиш билдирган.

Манбага кўра, инвесторлар “Реал”нинг тахминан 10 фоиз акцияси учун 1 млрд евро атрофидаги таклифни тайёрламоқда. Флорентино Перес хорижий сармоя жалб қилиш режаларини фаоллаштиргани айтилмоқда. Клубнинг айни дамдаги умумий баҳоси 10 млрд евродан юқори экани қайд этилган.

Декабрь ўрталарида клуб аъзолари қатнашадиган навбатдан ташқари йиғилиш ўтказилиши режалаштирилган. Унда иқтисодий ҳуқуқларга эга, лекин бошқарувда иштирок этмайдиган миноритар акциядорларни жорий этиш масаласи муҳокама қилинади.

Sixth Street ҳозирда “Сантиаго Бернабеу”даги тижорат лойиҳаларида шерик ҳисобланади. LVMH эса яқинда клубнинг расмий таъминловчисига айланган. Улуш сотиб олиш ҳар икки томон учун ҳам узоқ муддатли, хавфи паст стратегик қадам сифатида баҳоланмоқда.

Лойиҳа маъқулланса, “Реал” бошқарув ва спорт марказлашувини сақлаган ҳолда, ривожланиш учун қўшимча молиявий ресурсларга эга бўлади.

• Ispaniya
• Real