78.ru нашрининг хабар беришича, Ленинград вилояти Кингисепп туманидаги автобусда пичоқланган 32 ёшли ўзбекистонлик эркак ўлик ҳолда топилган.

Мазкур ҳодиса Пулково қишлоғи яқинида содир бўлган. Икки эркак автобусда муштлашган. Улардан бири иккинчисининг (Ўзбекистон фуқароси) юрагига пичоқ санчган. Оқибатда ўзбекистонлик эркак олган тан жароҳатидан вафот этган.

19 июль куни эрталаб полиция ходимлари автобус салонида пичоқбозлик бўлганидан хабар топган. Бир неча соатдан сўнг Катта Куземкино қишлоғидаги вақтинчалик турар жой шаҳарчаси ҳудудида жиноятда айбланган эркак қўлга олинган.

Маълум бўлишича, у январь ойида Санкт-Петербургга келган, дарҳол миграция рўйхатидан ўтган ва ишлашни режалаштирган.

Ҳуқуқ-тартибот идоралари томонидан Россия Жиноят кодексининг 105-моддаси (қотиллик) билан жиноят иши қўзғатилган. Ҳибсга олинган шахс сўроқ қилиниб, вақтинча сақлаш ҳибсхонасига жўнатилган.

• Автобус
• Россия