Россиянинг турли ҳудудларида қаровсиз қолган яна 6 нафар бола Ўзбекистонга қайтарилди. Бу ҳақда болалар омбудсмани хабар берди.

Хабарга кўра, болалар омбудсмани Россиядаги ҳамкасбига мурожаат йўллаб, қаровсиз қолган вояга етмаганларни улар турган ҳудудлардаги болалар муассасаларига вақтинча жойлаштиришда тезкор амалий ёрдам сўраган. Россия болалар омбудсмани томонидан зарур кўмак чоралари кўрилиб, болалар учун барча зарур шарт-шароитлар таъминланган.

Натижада 8 февраль куни кейинги гуруҳ — 6 нафар бола (уларнинг 4 нафари Москва шаҳридан, 2 нафари Москва вилоятидан) Ички ишлар вазирлиги масъуллари ҳамроҳлигида Ўзбекистонга олиб келинган.

Ҳозирда болалар Тошкент шаҳар ИИББ Ҳуқуқбузарлик профилактикаси бошқармасининг Вояга етмаганларга ижтимоий-ҳуқуқий ёрдам кўрсатиш марказига вақтинча жойлаштирилган. Ижтимоий ҳимоя миллий агентлиги томонидан уларнинг яқин қариндошлари васийлигини қонуний тартибда расмийлаштириш чоралари кўрилмоқда.

• Болалар
• ИИВ
• Россия