Жиноят ишлари бўйича Ўзбекистон туман судида Наманган шаҳри собиқ ҳокими Анвар Отахўжаев ва яна беш нафар шахсга оид жиноят ишини кўриб чиқиш бошланди.

Суд маълумотига кўра, жами олти нафар судланувчидан уч нафари қамоқда сақланмоқда, қолган уч нафарига эса муносиб хулқ-атворда бўлиш тарзидаги эҳтиёт чораси қўлланган.

Дастлабки тергов хулосасига кўра, судланувчилар ўзлаштириш ёки растрата йўли билан талон-торож қилиш, фирибгарлик, мансаб ваколатини суиистеъмол қилиш, мансаб ваколати доирасидан четга чиқиш, мансаб сохтакорлиги, пора олиш, пора беришда иштирокчилик ҳамда пора олиш-беришда воситачилик қилиш каби жиноятларни содир этганликда айбланмоқда.

Тергов маълумотларига кўра, Анвар Отахўжаев 2025 йил сентябрь ойида Давлат хавфсизлик хизмати томонидан қўлга олинган. У пойабзал ишлаб чиқарувчи корхона раҳбари билан тил бириктириб, тадбиркорга 35 сотих ер майдонида кўп қаватли уй қуриш ҳуқуқини олиб беришни ваъда қилгани, бунинг эвазига 60 минг АҚШ доллари талаб қилингани айтилмоқда.

Анвар Отахўжаев 2023 йил декабрь ойида Наманган шаҳри ҳокими лавозимига тайинланган эди. Ҳозирда мазкур жиноят иши судда кўриб чиқилмоқда.