7 август куни Олий Мажлис Сенатининг 18-ялпи мажлисида “Ўзбекистон Республикаси Президенти Администрацияси тўғрисида”ги Конституциявий қонун маъқулланди. Мазкур ҳужжат Президент Администрациясининг ҳуқуқий мақоми, асосий вазифалари, ваколатлари ва фаолиятини ташкил этиш тартибини белгилаб беради.

Қонун Ўзбекистон Республикаси Конституцияси талабларидан келиб чиқиб ишлаб чиқилган. Унда Президент Администрациясининг давлат бошқаруви тизимидаги ўрни, ҳуқуқий мақоми ва фаолиятининг асосий йўналишлари конституциявий қонун даражасида мустаҳкамланмоқда.

Ҳужжатда Администрациянинг мақоми, фаолият принциплари, таркибий тузилиши ва ишини ташкил этиш тартиби, шунингдек, давлат ҳокимияти органлари ва ташкилотлари билан ўзаро ҳамкорлиги аниқ белгилаб берилган. Бундан ташқари, Администрация мансабдор шахслари, бошқарув ва хизматчи ходимларининг фаолият кафолатлари ҳам назарда тутилган.

Қонунни ишлаб чиқишда АҚШ, Финляндия, Чехия, Словакия, Руминия, Латвия, Қозоғистон ва бошқа давлатларнинг тегишли тажрибаси ўрганилган.

Сенаторларнинг таъкидлашича, Конституциявий қонуннинг қабул қилиниши Президент фаолиятини ташкилий, ҳуқуқий ва таҳлилий жиҳатдан таъминлаш механизмларини такомиллаштириш, давлат органлари ўртасидаги ҳамкорликни мустаҳкамлаш ҳамда бошқарув самарадорлигини оширишга хизмат қилади.

Муҳокама якунида сенаторлар қонунни маъқуллади.

Эслатиб ўтамиз, 4 август куни мазкур қонун Олий Мажлис Қонунчилик палатаси депутатлари томонидан биринчи ўқишда кўриб чиқилиб, қабул қилинган эди.