Қозоғистонда илк бор бортида йўловчи бўлган учувчисиз ҳаво таксиси синов парвозини амалга оширди. Бу ҳақда Қозоғистон Транспорт вазирлиги хабар берди.

Парвоз Остона шаҳрида “Келажак ўйинлари — 2026” халқаро турнири доирасида, махсус ажратилган ҳудуд устида амалга оширилган. ЭҲ216-С русумли вертикал учиб-қўнувчи электр аппарати (эВТОЛ) мамлакат тарихида илк бор реал шароитларда йўловчи билан учувчисиз парвозни намойиш этди.

EH216-С икки кишини ташишга мўлжалланган бўлиб, соатига 130 километргача тезликка эриша олади. Учувчисиз режимда аппарат 35 километргача масофани босиб ўтиши мумкин.

Дастлаб Қозоғистон ҳукумати мамлакатнинг табиий, маданий ва тарихий диққатга сазовор жойлари устидан 5 дақиқадан 30 дақиқагача давом этадиган намойиш ва сайёҳлик парвозларини йўлга қўйиш имкониятини кўриб чиқмоқда.

Келажакда бундай учувчисиз ҳаво таксилари шаҳар транспорт тизимининг бир қисмига айланиши ва мавжуд транспорт турларини тўлдириши мумкин.

Шунингдек, аппаратлардан шошилинч тиббий ёрдам кўрсатиш, дори-дармон етказиб бериш, қидирув-қутқарув ишлари, ёнғинларни ўчириш ва логистика каби йўналишларда фойдаланиш режалаштирилмоқда.

Лойиҳа доирасида Қозоғистонда йўловчи ташувчи учувчисиз аппаратларни ишлаб чиқаришни маҳаллийлаштириш ҳам кўзда тутилган. Бу янги юқори технологияли ишлаб чиқариш қувватлари ва иш ўринларини яратиш, шунингдек, саноат кооперациясини кенгайтиришга хизмат қилиши кутилмоқда.