Самарқандда 6 октябрь куни вояга етмаган қиз прокуратурага ариза билан мурожаат қилиб, 2 октябрь куни бир неча шахс томонидан зўрлангани ва уларга қонуний чора кўришни сўраган.

Бош прокуратура матбуот хизмати раҳбари Ҳаёт Шамсутдиновнинг Хабардор.узъга маълум қилишича, олиб борилган тергов ҳамда тезкор тадбирлар давомида 9 нафар гумонланувчи аниқланиб, терговга жалб қилинган ва 8 нафар шахс, шу жумладан, Қўшработ тумани прокуратурасининг собиқ иш юритувчиси процессуал тартибда ушланган, яна бир гумонланувчини ушлаш чоралари кўрилмоқда.

Маълум бўлишича, Қўшработ тумани прокуратурасининг иш юритувчиси ҳам алоқадорлиги аниқлангандан сўнг 30 октябрь куни вилоят прокурорининг тегишли буйруғи билан прокуратура органларидан бўшатилган.

Терговга қадар текширув ҳаракатлари ҳамда тайинланган судга оид тиббиёт ва биологик экспертизалари натижаларига кўра, 31 октябрь куни Самарқанд вилояти Иштихон тумани прокуратураси томонидан Жиноят кодексининг 119-моддаси (жинсий эҳтиёжни зўрлик ишлатиб ғайритабиий усулда қондириш) билан жиноят иши қўзғатилган ва терговга тааллуқлилиги бўйича ички ишлар органига юборилган.

Ҳозирда жиноят иши тергови устидан назорат ўрнатилган.

Тузатиш: Мазкур хабар кеча 13 ноябрь куни ижтимоий тармоқларда тарқалган эди. Бош прокуратуранинг маълум қилишича, қиз 23 сентябрь куни ўғирлаб кетилган ва 6 октябрда топилган (аввал айтилганидек, октябрь ва ноябрда эмас). Юзага келган хатолик учун Бош прокуратура ва кузатувчиларимиздан узр сўраймиз.

• Самарқанд