Samsung ўзининг Galaxy смартфонларида Google қидирув тизимидан воз кечиши мумкин. Компания унинг ўрнига Microsoft'нинг Bing қидирув тизимини жорий қилмоқчи.

NYT маълумотларига кўра, Google ходимлари Жанубий Корея компанияси бошқа ҳамкор қидираётганидан ҳайратда қолган. Яқин вақтгача Bing қидирув тизими рақобатбардош эмас эди, лекин унга сунъий интеллект ва фойдаланувчилар билан мулоқот қила оладиган чат боти қўшилгач, ҳамма нарса ўзгарди.

Барча Galaxy смартфонларида Google қидируви ўрнатилишини кафолатлайдиган смартфон ишлаб чиқарувчиси билан тузилган ушбу шартнома Google'га ҳар йили 3 миллиард доллар олиб келарди.

Рақобатчилар таҳдиди Google компаниясини энг янги технологиялар асосида янги қидирув хизмати яратишга мажбур қилди. Бундан ташқари, жорий қидирув ҳам сунъий интеллект функциялари асосида янгиланади, деб хабар беради NYT.

• Google
• Samsung
• қизиқарли