Ижтимоий тармоқларда Сирдарёда эркак бемор хотинини рашк қилиб шифокорни калтаклагани ҳақида видео тарқалди. Ҳолат юзасидан вилоят ИИБ изоҳ берди.

Маълум қилинишича, “102” орқали келиб тушган чақирувда шифохонага кўрикка олиб келинган беморнинг яқинлари ўртасида жанжал келиб чиққан.

Воқеа жойига етиб борган профилактика инспекторлари ҳолатни ўрганиш жараёнида бемор аёлни турмуш ўртоғи ва ўғли шифокор кўригига олиб келгани, кўрик вақтида навбатчи шифокор беморни ўтиришга ёрдамлашиб, қорин соҳасини текшираётган пайт рашк туфайли эри шифокор билан жанжаллашиб кетганини аниқлади.

Ўтказилган терговга қадар текширув доирасида шифокор суд-тиббий экспертизадан ўтказилди. Экспертиза хулосасига кўра, шифокорда тан жароҳати ёки шикаст излари аниқланмади.

Тўпланган материаллар Жиноят ишлари бўйича Мирзаобод туман судида кўриб чиқилди. Суд қарорига кўра, эркак Маъмурий жавобгарлик тўғрисидаги кодекснинг 183-моддаси (майда безорилик) ҳамда 197 прим 7-моддаси (тиббиёт ходимининг қонуний фаолиятига тўсқинлик қилиш) талабларини бузган деб топилди ва унга 15 сутка маъмурий қамоқ жазоси тайинланди.

• Janjal
• Шифокор
• Сирдарё
• ma’muriy qamoq