Давлат хавфсизлик хизмати ходимлари Фарғона вилояти ва Тошкент шаҳрида ўтказилган тезкор тадбирлар давомида контрафакт диний адабиётларни чоп этиш ва тарқатиш билан шуғулланган ноқонуний босмахоналарни аниқлади. Бу ҳақда Давлат хавфсизлик хизмати маълум қилди.

Фарғона вилоятининг Бувайда туманида яшовчи, 1986 йилда туғилган фуқаро қариндошлари билан биргаликда тегишли лицензия ва рухсатномаларсиз диний мазмундаги китобларни чоп этиш билан шуғуллангани аниқланган. Тадбир давомида ушбу манзилдан 17 579 дона тайёр китоб, 500 килограммдан ортиқ ярим тайёр контрафакт китоблар ҳамда тўртта босма ва елимлаш ускунаси ашёвий далил сифатида олиб қўйилган. Шунингдек, 216 минг дона пиротехника воситаси мусодара қилинган.

Шунга ўхшаш ҳолат Тошкент шаҳрининг Янгиҳаёт туманида ҳам аниқланган. 1981 йилда туғилган фуқарога тегишли ноқонуний босмахонадан 8,5 мингдан ортиқ контрафакт диний адабиёт процессуал тартибда олиб қўйилган.

Ҳар икки ҳолат юзасидан ҳозирда суриштирув ишлари олиб борилмоқда.