Тошкент марказида 1912-йилда барпо этилган собиқ дизел электр стансияси биноси пойтахт саноат меъморчилигининг ноёб намуналаридан бири ҳисобланади. Узоқ йиллар давомида қаровсиз қолган мазкур иншоот вақт ўтиши билан емирилиб, бутунлай йўқолиб кетиш хавфи остида эди.

Пойтахтнинг энг гавжум ҳудудларидан бирида жойлашган бу бинодан тижорат мақсадларида фойдаланиш, уни навбатдаги замонавий мажмуага айлантириш мумкин эди. Аммо тарихий асраб-авайлаш ва маданиятни ривожлантириш устувор вазифа сифатида танланди.

Президентимиз Шавкат Мирзиёев ташаббуси билан тарихий иншоотни қайта тиклаш ва уни замонавий санъат ривожига хизмат қиладиган маданий масканга айлантиришга қарор қилинди.

Бугун эса бир вақтлар қаровсиз қолган ушбу бино янги қиёфа ва мазмун касб этиб, Тошкент Замонавий санъат маркази сифатида ўз фаолиятини бошламоқда.

Янги марказ нафақат тарихий обиданинг сақлаб қолинишини, балки Ўзбекистонда замонавий санъат ва маданий мулоқот учун янги имкониятлар яратилаётганини ҳам намоён этади.

Марказ маҳаллий рассомлар, ижодкорлар ва ёш тадқиқотчиларни қўллаб-қувватлаш, улар учун халқаро ҳамкорлик ва янги ижодий имкониятлар яратишга хизмат қилади.

Марказ ўз фаолиятини рамзий маънога эга «Ҳикмаҳ» кўргазмаси билан бошлайди. Кўргазмада 11 нафар етук санъаткорнинг ижод намуналари жамланган бўлиб, улар орқали мозий ҳикмати, аждодлар хотираси ва замонавий эстетиканинг ўзаро уйғунлиги намоён этилади.

Бир вақтлар қаровсиз қолган тарихий бино бугун санъат, ижод ва тафаккур масканига айланмоқда. Бу ташаббус тарихий асраб-авайлаш билан бирга, уни келажак авлод учун янги мазмун ва янги нафас билан яшашини таъминлайди.