Жорий йилнинг 13 ноябрь куни Москва вилоятининг Солнечногорск шаҳарчаси Прибрежная кўчасида жойлашган қурувчиларнинг вақтинча турар жойида ёнғин юз берганди. Ўшанда воқеа сабабли 2 киши жароҳат олган ва 4 киши вафот этган. Ташқи меҳнат миграцияси агентлиги шу воқеадан сўнг ютуб ижтимоий тармоғида Москва вилоятида содир бўлган ёнғин оқибатида ҳалок бўлган Ўзбекистон фуқаролари жасадларини Ватанга қайтаришда муаммолар юзага келаётгани ҳамда бунинг учун маблағ йиғилаётгани ҳақида мурожаат юзасидан баёнот берди.

Қайд этилишича, вафот этганларнинг барчаси Ўзбекистон фуқаролари, аммо жасадларни Ватанга қайтариш учун қайси жасад қайси шахсга тегишли эканини аниқлаш талаб этилади.

Агентликнинг хабар беришича, Россия Федерацияси қонунчилигига кўра, давлат ташкилоти томонидан ўтказиладиган ДНК текшируви натижалари олингач, яъни, ҳар бир жасаднинг шахси аниқлангандан кейин тергов қўмитаси рухсати билан жасадларни олиб чиқиб кетишнинг имкони бўлади.

Шу боис, агентлик марҳумларнинг қариндошларидан чет давлат қонунлари, тартиб қоидаларини эътиборга олишларини ҳамда ижтимоий тармоқ фаолларидан уларнинг айни пайтдаги ҳиссиётларидан фойдаланиб, оммани чалғитиш, маблағ йиғишга қаратилган чиқишлар қилмасликларини сўрамоқда.

• Россия
• ўзбек
• ёнғин