Пойтахтимизда рекорд даражадаги 5831 нафар шахматчини ўзида жамлаган V «Заковат-Гамбит» турнирининг ҳал қилувчи финал ўйинларига старт берилди.

Бу йилги мусобақа янада кенг қамровли бўлиши ва барча шахматсеварларга имкон бериши учун илк бор икки хил саралаш тизими жорий этилди: аввал республиканинг барча 14 ҳудудида юзма-юз баҳслар, сўнгра эса онлайн платформада қўшимча саралаш ўйинлари ташкил қилинди.

«Заковат арена» биносида ўтаётган финал баҳсларида иштирокчилар ўз даражаларига кўра бешта гуруҳга бўлинган ҳолда жами 620 миллион сўмлик соврин жамғармаси учун ўзаро дона сурмоқда. Ушбу гуруҳларнинг ҳар бирида ғолибликни қўлга киритганларга 50 миллион, иккинчи ўринга 30 миллион, учинчи ўринга ва аёллар ўртасидаги энг кучли иштирокчига эса 20 миллион сўмдан пул мукофотлари берилиши белгиланган.