АҚШнинг Нью-Йорк шаҳрида Ўзбекистон ва Нидерландия терма жамоалари ўртасидаги ўртоқлик учрашуви олдидан ўзбекистонлик футболчилар ва мураббийларнинг қатъий хавфсизлик текширувидан ўтказилгани юзасидан Ўзбекистон Ташқи ишлар вазирлиги муносабат билдирди.

Вазирлик маълумотига кўра, Нью-Йоркдаги Бош консулхона орқали АҚШнинг тегишли идоралари билан алоқа ўрнатилиб, юзага келган ҳолат бўйича расмий тушунтириш сўралган.

ТИВ вакили Омонулла Файзиевнинг таъкидлашича, давлатларнинг хавфсизлик чораларини ўз ички қоидалари асосида амалга ошириш ҳуқуқи ҳурмат қилинади. Шу билан бирга, бундай жараёнлар спорт мусобақаларининг ўзаро ҳурмат ва дўстона муносабатларга асосланган руҳига салбий таъсир кўрсатмаслиги муҳимлиги қайд этилган.

Аввалроқ ижтимоий тармоқларда учрашув олдидан Ўзбекистон терма жамоаси аъзолари қўл металлодетекторлари ёрдамида текширилгани акс этган видеолар тарқалган эди. Хавфсизлик ходимлари футболчилар ва мураббийлардан сумкалари ҳамда спорт анжомларини ерга қўйишни сўраган, ҳудудда хизмат ити билан кинолог ва бошқа хавфсизлик ходимлари ҳам бўлган.

Ўзбекистон миллий терма жамоаси бош мураббийи Фабио Каннаваро мазкур текширувларни одатий хавфсизлик амалиёти сифатида баҳолаган. Ўзбекистон футбол ассоциацияси эса бундай тартиб хавфсизлик талаблари билан боғлиқ бўлиши мумкинлигини билдирган.

Ҳозирча АҚШ томони ушбу ҳолат юзасидан расмий изоҳ бермаган.