Давлат хавфсизлик хизматининг Чегара қўшинлари ва Самарқанд вилояти бўйича бошқармаси ҳамда вилоят Ички ишлар бошқармаси ҳамкорлигида ўтказилган тезкор тадбирда Булунғур туманида яшовчи, 1996 ва 1997 йилларда туғилган 2 нафар шахс 79 кг 358 гр “опий” моддасини Тожикистон Республикасидан контрабанда йўли билан Ўзбекистонга олиб келиб, келгусида сотиш мақсадида хуфия жойга яшириб қўйганликлари аниқланди ва ушбу гиёҳвандлик воситаси ашёвий далил сифатида олинган. Бу ҳақда ДХХ матбуот хизмати хабар берди.

Шунингдек, тезкор тадбир давом эттирилиб, 1996 йилда туғилган қонунбузарнинг кўрсатмаси асосида, муқаддам дала майдонига яшириб қўйилган 1 кг 953 гр “метамфетамин” синтетик наркотик моддаси ҳам олинган.

Бошқа ҳолатда эса Сурхондарё вилоятининг Узун туманида яшовчи, 1994 ва 1997 йилларда туғилган 2 нафар шахс ва Тожикистон Республикасининг Турсунзода туманида истиқомат қилувчи, 1997 йилда туғилган Тожикистон фуқароси давлат чегарасини бузган ҳолда, 30 кг 357 гр “опий” моддасини Ўзбекистон ҳудудига олиб ўтган вақтларида Чегара қўшинлари ҳарбий хизматчилари томонидан қўлга олинган.

 Аниқланишича, улар тожикистонлик наркосавдогарга тегишли ушбу заҳри қотилни маълум бир ҳақ эвазига белгиланган манзилга етказиб беришлари керак бўлган.

Шунингдек, тезкор тадбир давом эттирилиб, мазкур гиёҳвандлик воситасининг буюртмачиси ҳисобланган – Денов шаҳрида яшовчи, 1986 йилда шахс ҳам қўлга олинади.

Ҳозирда ҳар икки ҳолат бўйича Жиноят Кодексининг 246 ва 273-моддалари билан жиноят ишлари қўзғатилиб, қонунбузарларга нисбатан “қамоқ” эҳтиёт чораси қўлланилган.

• ДХХ
• Гиёҳвандлик
• Жиноят
• Самарқанд
• Сурхондарё
• Тожикистон