Ливия собиқ раҳбари Муаммар Қаззофийнинг ўғли Саиф ал-Ислом Қаззофий ўлдирилди. Бу ҳақда марҳумнинг оиласи, адвокати ва манбаларга таяниб Reuters хабар берди.

53 ёшли Саиф ал-Исломнинг ўлими тафсилотлари номаълум. Ливия бош прокурорининг идораси ва суд-тиббиёт шифокорлари жасадни текшириб, унинг ўқ жароҳатларидан вафот этганини аниқлаган. Ҳозирда идора гумонланувчиларни аниқлаш ва жиноий иш қўзғатиш учун зарур чораларни кўриш устида ишламоқда.

Al Hadath телеканалининг маълум қилишича, қотиллик Аз-Завия шаҳри яқинидаги уйининг боғида содир бўлган. Тўрт нафар ҳужумчи Саиф ал-Исломни оғир яралаб, воқеа жойидан яширинган.

Қуролланган одамлар унинг уйига бостириб киришдан олдин кузатув камераларини ўчириб қўйган. Тунги 02:30 атрофида бошланган отишма оқибатида Саиф жон берган.

Al Hadath хабарига кўра, айрим маҳаллий ОАВлар Қаззофийнинг ўғли Ливия Миллий бирлик ҳукуматига қарашли 444-жанговар бригада кучлари билан тўқнашувда ҳалок бўлганини ёзмоқда. Бироқ бригаданинг ўзи бунга алоқадорлигини расман рад этиб, Аз-Завия ҳудудида уларнинг бўлинмалари бўлмаганини билдирган.

Саиф ал-Ислом Қаззофий — Муаммар Қаззофийнинг иккинчи ўғли, у расмий давлат лавозимларида ишламаган бўлса-да, узоқ вақт давомида отасидан кейин мамлакатдаги энг нуфузли шахслардан бири ҳисобланган. У “Халқаро Қаззофий хайрия жамғармаси”ни ташкил этиш ташаббускори ҳисобланади. Саиф ал-Ислом Қаззофий гаровга олинганларни озод қилиш бўйича музокараларда ва дипломатик миссияларда иштирок этган.

2011 йилда Муаммар Қаззофий ҳокимиятдан ағдарилиб, ўлдирилгач, Саиф ҳибсга олиниб, 2017 йилгача қамоқда сақланган. 2011 йилда Халқаро жиноий суд уни инсониятга қарши иккита жиноят моддаси бўйича қидирувга берган, аммо Ливия уни топширмаган. Кейинчалик Саиф сиёсатга қайтиб, 2018 ва 2021 йиллардаги президентлик сайловларида иштирок этишни режалаштирган, аммо бу сайловлар ўтказилмаган. 2021 йилда Ливия прокуратураси уни Россиянинг “Вагнер” хусусий ҳарбий компанияси жангарилари билан алоқада гумонланиб ҳибсга олишга ордер берган.

• Ливия
• Отишма