“Хорижда меҳнат фаолиятини амалга ошираётган Ўзбекистон фуқароларининг ҳуқуқ ва қонуний манфаатларини ҳимоя қилиш мақсадида Элчихона томонидан меҳнат мигрантларига кўмаклашиш ва юзага келаётган муаммоларини ҳал этишга қаратилган чора-тадбирлар мунтазам равишда амалга оширилади”,– деб хабар қилмоқда “Дунё” агентлиги.

Яқинда Элчихона консулининг ишчи рақамига Ўзбекистон фуқаролари – қашқадарёлик фуқаролар Сербиядан ватанга қайтишда ёрдам сўраб мурожаат қилишган.

Улар Ўзбекистонга авиачипта сотиб олиш учун молиявий маблағи йўқлигини маълум қилган. Фуқароларнинг сўзларига кўра, юзага келган ҳолатга серб иш берувчиси уларни белгиланган тартибда расмийлаштирмагани ва улар билан меҳнат шартномаси тузмагани сабаб бўлган.

Оқибатда ўзбекистонликлар иш ҳақини ололмай, уч ой ишлагандан сўнг моддий қийин аҳволга тушиб қолган. Улар ватанга қайтиш учун молиявий имконияти йўқлиги сабабли Ўзбекистон Республикаси Элчихонасига ёрдам сўраб мурожаат қилган.

Юқоридаги ҳолатларни инобатга олган ҳолда, Элчихона консуллик бўлими Ўзбекистон Ташқи меҳнат миграцияси агентлиги ҳамда Меҳнат мигрантларини қўллаб-қувватлаш ва ёрдам жамғармаси билан фуқароларга авиачипта харид қилиш бўйича фикр алмашган.

Келишув натижаларига кўра, фуқароларга Ўзбекистонга қайтиш учун авиачипталар сотиб олинган.

• Elchixona
• Моддий ёрдам
• Ўзбекистонлик
• Сербия
• migrant