Жиззах шаҳри ва Шароф Рашидов тумани ўртасидаги 40 гектар бўш ер майдонида Янги Жиззах шаҳри қурилади. Бу президентнинг 30 январдаги “2026−2027 йилларда Жиззах вилоятини ижтимоий-иқтисодий ривожлантиришни жадаллаштириш бўйича қўшимча чора-тадбирлар тўғрисида”ги қарорида кўзда тутилган.

Ҳужжатга кўра, Жиззах шаҳри ва Шароф Рашидов тумани ягона агломерация сифатида ривожлантирилади. Бу бўйича бош режа ва шаҳарсозлик ҳужжатлари хорижий экспертларни жалб қилган ҳолда ишлаб чиқилиши ва 1 апрелга қадар Вазирлар Маҳкамасига киритилиши керак. Бош режа ишлаб чиқиш ва инфратузилма билан таъминлаш учун 40 миллиард сўм ажратилади.

Бош режага Жиззах шаҳри ва Шароф Рашидов тумани ўртасидаги 40 гектар бўш ер майдонига Янги Жиззах шаҳрини жойлаштириш ҳамда унда 1200 хонадонли 50 та кўп қаватли уйларни қуриш бўйича аниқ лойиҳалар киритилиши белгиланди.

Ҳудудда ягона маъмурий марказ қурилиб, тумандаги давлат муассасалари шу ерга кўчирилади, бўшаган бинолар эса хусусий секторга берилади. Жиззах шаҳри ва Шароф Рашидов туманини боғлайдиган ягона жамоат транспорти тизими йўлга қўйилади. Шунингдек, Жиззах шаҳри ичидаги тирбандликларни камайтириш мақсадида 10 км узунликда айланма йўл қурилади. Ҳудудда зарур муҳандислик-коммуникация инфратузилмаси яратилиб, ижтимоий соҳа объектлари қурилади.

Бундан ташқари, Шароф Рашидов туманидаги 9 та маҳаллада инфратузилма яхшиланади. Бу Жаҳон банки иштирокидаги “Қишлоқ инфратузилмасини ривожлантириш” 2-босқич лойиҳаси доирасида амалга оширилиб, 8 миллион доллар маблағ ажратилади.

Шунингдек, ҳужжатга мувофиқ, Жиззах вилоятида 2028 йилгача ялпи ҳудудий маҳсулот ҳажмини йиллик ўртача 8,5 фоизга, саноат ишлаб чиқариш ҳажмини 7,8 фоизга, бозор хизматлари ҳажмини 13,2 фоизга ҳамда қишлоқ хўжалиги маҳсулотлари етиштириш ҳажмини 4,6 фоизга ўстириш режалаштирилмоқда.

2026 йилда ишсизлик даражасини 3 фоизга ва камбағаллик даражасини 2,8 фоизга тушириш, Жиззах шаҳри, Шароф Рашидов, Бахмал, Ғаллаорол, Дўстлик, Зомин ва Зафаробод туманларини камбағаллик ва ишсизликдан холи ҳудудга айлантириш кўзда тутилган.

• Жиззах
• qurilish