Тошкент ҳайвонот боғида шер ва жайраларга тош отган эркак 2 миллион 884 минг сўм миқдорида жаримага тортилди. Бу ҳақда ҳайвонот боғи матбуот хизмати хабар берди.

Маълум қилинишича, воқеа 13-август куни содир бўлган. Ташриф буюрувчилардан бири ҳайвонларга тош ота бошлаган. Жайралар волерининг очиқ бўлгани сабабли, ташланган тошларнинг айримлари ҳайвонларга теккан.

Ҳайвонот боғи маъмуриятининг билдиришича, эркакнинг хатти-ҳаракатини унинг фарзанди ҳам такрорлаб, ҳайвонларга тош отган. Бундан ташқари, эркак тошлар ҳайвонларга текканидан сўнг қарсак чалиб, бундан мамнун бўлганини намойиш этган.

Ҳодиса видеокузатув камералари орқали қайд этилган. Кейинчалик ҳуқуқбузарнинг шахси аниқланиб, унга нисбатан тегишли чоралар кўрилган.

Ички ишлар органлари профилактика инспектори қарорига кўра, эркакка 2 миллион 884 минг сўм жарима солинган. Шунингдек, у ўз қилмиши учун узр сўраган.