Тошкент вилоятида яшовчи фуқаронинг аризаси асосида уюшган жиноий гуруҳ қўлга олинди, деб хабар бермоқда ИИВ матбуот хизмати.

Гуруҳ аъзолари Тошкент вилоятидан Тошкент шаҳрининг Яшнобод туманига қатновчи такси ҳайдовчиларини қўрқитиб, ўзбошимчалик билан ойлик тўлов жорий қилган.

Хусусан, Тошкент шаҳрида туғилган “Буқа”лақабли 37 ёшли Алимқулов Шерзод Умаралиевич қўлга олинган. У муқаддам ЖКнинг 277-моддаси (безорилик) билан уч марта судланган.

Турли спорт турлари билан шуғулланиб келган ушбу фуқаро шериклари билан Damas автомашинаси ҳайдовчисини уриб, унга тан жароҳати етказган ҳамда жабрланувчининг тирикчилик манбаи бўлган автомашина калитларини зўрлик ишлатиб тортиб олган.

Жиноий гуруҳ доимий равишда ҳайдовчиларнинг йўналиш бўйлаб ҳаракатланишига тўсқинлик қилган. Шунингдек, ариза муаллифи ҳаёти ва соғлиғига жиддий зарар етказиш билан қўрқитилган ҳамда Яшнобод туманига қатновларни амалга ошириш имконияти эвазига ундан 2 ойлик аванс сифатида 810 доллар олинган.

Кейинчалик, кейинги тўловларни тўлиқ амалга ошира олмаганлиги сабабли, унга ўзбошимчалик билан йўналишга чиқиш тақиқланган.

Мазкур ҳолат юзасидан жиноий гуруҳ етакчиси ва унинг шерикларига нисбатан ЖКнинг 165-моддаси 2-қисми “в” банди (бир гуруҳ шахслар томонидан олдиндан тил бириктириб товламачилик қилиш) билан жиноят иши қўзғатилган.

Ушбу жиноий гуруҳнинг хатти-ҳаракатларидан жабр кўрган фуқаролардан ички ишлар органларига мурожаат қилишлари ёки 102 рақамига қўнғироқ қилишлари сўралади.

• Ҳайдовчи
• Жиноят
• Taksi
• Тошкент
• Яшнобод тумани