“Ўзгидромет” маълумотига кўра, бугун тушдан кейин Тошкент шаҳрида об-ҳаво кескин ўзгариши мумкин. Пойтахтда қисқа муддатли ёмғир ёғиши, момақалдироқ кузатилиши ҳамда айрим ҳудудларда шамол тезлиги сониясига 12–15 метрга етиши прогноз қилинмоқда. Шунингдек, Тошкент ва республиканинг айрим ҳудудларида чанг-тўзонлар кузатилиши эҳтимоли ҳам мавжуд.

Тоғолди ва тоғли ҳудудларда эса ёмғир ёғиши, айрим жойларда кучли ёғингарчилик кузатилиши, натижада сел-сув тошқинлари юзага келиши мумкин. Мутахассислар фуқаролардан об-ҳаво шароитининг кескин ёмонлашуви сабабли эҳтиёт чораларини кўришни, зарурат бўлмаса узоқ сафарларга чиқмасликни тавсия этмоқда. Айниқса, тоғли ҳудудларда дам олаётган фуқаролар ва ҳайдовчилардан янада ҳушёр бўлиш сўралмоқда.