Ўзбекистон Республикаси фуқароси Ўткиров Жавоҳир Давроновичга нисбатан қўзғатилган жиноят иши бўйича суд ҳукми эълон қилинди. У Россия Федерацияси Жиноят кодексининг 205.5-моддаси 2-қисми, 30-моддаси 1-қисми, 205-моддаси 2-қисми “а” банди, 223.1-моддаси 3-қисми, 222.1-моддаси 4-қисми ҳамда 30-моддаси 1-қисми, 223.1-моддаси 3-қисмида назарда тутилган жиноятларни содир этишда айбланган.

Аниқланишича, 2023 йил январь ойида эркак Россия Федерациясида тақиқланган “Ислом давлати” террорчилик ташкилоти манфаатлари йўлида ҳаракат қилишга тайёрлигини билдирган видеомурожаат ёзиб олган.

Суд ҳужжатларига кўра, у ташкилот етакчисининг кўрсатмалари асосида Россия ҳудудида террорчилик ҳужуми амалга оширилиши мумкин бўлган аҳоли пунктини танлаш, нишон бўйича разведка ўтказиш ҳамда қўлбола портловчи қурилма тайёрлаш учун зарур биноларни ижарага олиш мажбуриятини олган.

2023 йил 23 сентябрь куни у Ўзбекистондан Россияга келиб, Ставропол шаҳрини танлаганини маълум қилган. Шундан сўнг у бир нечта объектларнинг фото ва видео тасвирларини тайёрлаб, уларни ташкилот вакилларига юборган.

Кейинчалик унга эҳтимолий ҳужум манзили сифатида Ставропол ўлкаси ҳукумат биноси кўрсатилган. 2023 йил декабрь ойида у портловчи мослама тайёрлаш учун зарур бўлган бутловчи қисмларни харид қилиб, уларни яширин жойда сақлаган.

2023 йил 18 декабрь куни айбланувчи қўлга олинган. Суд ҳукмига кўра, эркак айбдор деб топилиб, унга 20 йил муддатга озодликдан маҳрум қилиш жазоси тайинланган. Жазонинг дастлабки 5 йилини турмада, қолган қисмини эса қатъий тартибли колонияда ўташи белгиланган, шунингдек, 1 000 000 рубль миқдорида жарима ҳам қўлланилган.

Ҳукм қонуний кучга кирмаган бўлиб, томонлар Апелляция ҳарбий судига шикоят қилиниши мумкин.

• Ўзбекистон
• Россия
• Terrorchilik