2022 йил 15 июндан бошлаб Туркия давлатининг “ПАРЛАР ФИДАН Парлар фидан тарим урунлери гида текстил санайи ве тиcарей лимитед сиркети” (Питомник) кўчатхоналаридан Ўзбекистонга экиш материалларини олиб киришга вақтинчалик тақиқ ўрнатилди. Бу ҳақда Ўсимликлар карантини ва ҳимояси агентлиги маълум қилди.

Агентликка кўра, Марказий фитосанитария лабораторияси хулосасига кўра, мазкур ширкатга тегишли кўчатххоналардан олиб кирилган шафтоли (Дихиред нави) кўчатларида “Олхўрининг чўтир касаллиги” (Плум пох вирус) аниқланган. Мазкур касалликни Ўзбекистон ҳудудида тарқалиш хавфини олдини олиш мақсадида кўчатларга нисбатан вақтинчалик импорт чеклови ўрнатилган.

Қайд этилишича, “Олхўрининг чўтир касаллиги” (Плум пох вирус) Ўзбекистон учун карантин аҳамиятига эга бўлган зарарли организмлар рўйхатига киритилган.

Агентлик, шунингдек, кўчатлар ҳамда уруғликлар импорти билан шуғулланувчи тадбиркорларни огоҳликка чақириб, бу тардаги маҳсулотларни республика ҳудудига олиб келиш жараёнида Агентликни олдиндан хабардор қилиш зарурлигини таъкидламоқда.

“Импорт жараёнида белгиланган талабларга риоя этилмаса, маҳсулотлар чегара назорат пунктларидан ортга қайтарилиши ёки белгиланган тартибда йўқ қилиниши мумкин”, – дейилади хабарда.

Маълумот учун, “Олхўрининг чўтир касаллиги” (Плум пох вирус) асосан Эвропа мамлакатлари, хусусан, Австрия, Англия, Болгария, Венгрия, Германия, Голландия, Греция, Молдова, Полша,  Россия, Руминия, Сербия, Туркия, Украина, Чехия, Эстония, Шветсария, Швеция каби мамлакатларда тарқалган. Ушбу касаллик олхўри, тоғолча, ўрик, шафтоли каби меваларни зарарлайди. Касаллик туфайли чидамсиз дарахтларнинг 25-50 фоиз, баъзан 100 фоиз ҳосили йўқотилади. Зарарланган дарахтлар мевасининг кўпчилиги тўкилади, қолганлари майда ва таъмсиз бўлиб қолади. Касаллик белгилари дарахтлар вирус билан зарарлангандан сўнг 9-11 ой ўтганда намоён бўлади.

Шунингдек, касаллик билан зарарланган мевалар вақтидан олдин рангга киради, таркибида қанд моддаси камаяди ва соғломларидан 20-30 кун олдин тўкилади. Уларнинг бир қисми мумиёлашади. Кучли зарарланган чидамсиз навларнинг ҳосили бутунлай йўқотилиши мумкин.

• Агентлик
• Импорт
• Кўчат
• Ўзбекистон
• Туркия
• карантин
• тақиқ