Футбол бўйича Ўзбекистон U-20 терма жамоаси Аргентинада ўтадиган Жаҳон чемпионати олдидан Уругвай билан ўртоқлик ўйини ўтказади. Бу ҳақда ЎФА матбуот хизмати маълум қилди.

Равшан Ҳайдаров мураббийлигидаги жамоа мундиал олдидан Уругвайда йиғин ўтказади. Йиғин доирасида ўзбекистонлик ёш футболчилар 13 май куни Уругвайга қарши ўртоқлик ўйинида иштирок этади.

Маълумот учун, Уругвай ёшлари U-20 Жанубий Америка чемпионатида иккинчи ўринни қўлга киритган.
U-20 Жаҳон чемпионати 20 майдан 11 июнга қадар Аргентинада бўлиб ўтади.

Ўзбекистон U-20 терма жамоаси мусобақанинг А гуруҳидан жой олган ва унда Аргентина, Гватемала, Янги Зеландия каби жамоалар билан ўйнайди.

Осиёнинг амалдаги чемпионлари 20 май куни мусобақанинг очилиш ўйинида Аргентинага қарши майдонга тушади. 23 майда Янги Зеландия, 26 майда эса Гватемала билан ўйинлар белгиланган.

Айни вақтда Ўзбекистон U-20 терма жамоаси Испанияда йиғин ўтказмоқда. Жамоа 22 апрель куни Бразилияга қарши ўртоқлик ўйини ўтказиб, йирик ҳисобда ютқазди (1:4).

Йиғин доирасида вакилларимизни Доминикан Республикаси (25 апрель) ва Гибралтарга (27 апрель) қарши ўйинлар кутиб турибди.

• Футбол
• Ўзбекистон
• U-20
• Уругвай