Навоий вилоятининг Учқудуқ туманида йирик ёнғин содир бўлиб, савдо дўконлари ва омборхоналарга жиддий зарар етди. Ҳодиса 16 июнь куни “Мустақиллик” маҳалла фуқаролар йиғини ҳудудидаги Амир Темур кўчасида жойлашган савдо мажмуасида юз берган.

Дастлабки маълумотларга кўра, ёнғин МЧЖ ва якка тартибдаги тадбиркорга тегишли савдо дўконлари ҳамда омборхоналардан бирида келиб чиққан. Воқеа ҳақида хабар келиб тушиши билан ҳудудга Фавқулодда вазиятлар бошқармасининг ёнғин-қутқарув экипажлари, шунингдек, Навоий конь-металлургия комбинати ва “Навоиюран” давлат корхонаси қутқарувчилари сафарбар этилди.Жами олти та ёнғин-қутқарув экипажи жалб қилинган тезкор амалиёт натижасида аланга қисқа вақт ичида қуршаб олиниб, ёнғиннинг янада кенг ҳудудга тарқалишининг олди олинди. Қутқарувчиларнинг саъй-ҳаракатлари туфайли савдо мажмуасининг қарийб 2 минг квадрат метр майдони оловдан сақлаб қолинди.Шунга қарамай, ёнғин оқибатида дўкон ва омборхоналарнинг тахминан 300 квадрат метр майдони ёниб кетган. Ичкарида сақланаётган озиқ-овқат маҳсулотлари, қурилиш моллари ҳамда бошқа товар-моддий бойликлар ҳам зарар кўрган.

Расмий маълумотларга кўра, ҳодиса оқибатида ҳалок бўлганлар ёки тан жароҳати олган фуқаролар қайд этилмаган. Айни пайтда ёнғиннинг келиб чиқиш сабаблари ва етказилган моддий зарар миқдори бўйича тегишли мутахассислар томонидан суриштирув ишлари олиб борилмоқда.Эслатиб ўтамиз, шу куни Фарғона вилоятида ҳам ёнғин содир бўлиб, у ерда икки киши ҳалок бўлгани хабар қилинган эди. Мазкур ҳолатлар ёнғин хавфсизлиги қоидаларига қатъий риоя қилиш зарурлигини яна бир бор эслатмоқда.