Тошкент аҳолиси ва меҳмонлари хавфсизлигини таъминлайдиган сунъий интеллектуал тизим ишлаб чиқилди. Бу тузилма Тошкент Ички ишлар бош бошқармасининг ягона тезкор бошқарув марказида жойлашгани айтилмоқда. Ўзбекистон президенти Шавкат Мирзиёевнинг шахсан ўзи ушбу тизим фаолиятини кўздан кечирди. Маълумотларга кўра, дастур миллий дастурчиларимиз томонидан ишлаб чиқилиб, реал вақт давомида ким қаерда ва қачон жиноят содир этганини кечаю кундуз кузатиб аниқлайди.

Бу пойтахтдаги етти ярим минг видео камералар, давлат органларининг 55 та электрон маълумотлар базаси ҳамда ихтисослашган ахборот базаларининг интеграциялашуви натижасида амалга оширилади. Система ишга туширилгандан буён 925 та жиноят фош этилган, 30 та ўғирланган автомобиль ва 80 та бедарак йўқолган шахс топилган. Сунъий интеллект қидирув тизими орқали 1735 та жиноятда гумонланиб қидирувга берилган шахслар ушланган. Давлат раҳбари бу тизимни маҳалла нозирлари фаолиятига ҳам қаратиш, тезкорликни ошириш тўғрисида қўшимча топшириқлар берган.

• Jamoat xavfsizligi
• Президент