Хитой Халқ Республикаси автомобиль экспорт қилиш бўйича янги рекорд ўрнатди ва биринчи марта хорижга сотилган автоуловлар сони 3 миллион донадан ошди. Энг катта ўсиш электромобиллар сегментида қайд этилган. Бу ҳақда “South China Morning Post” нашри хабар берди.

Хитой автомобиль бозори учун 2022 йил муҳим воқеаларга бой бўлди – мамлакат дунёдаги автомобилларнинг асосий экспортчиларидан бирига айланди. Мамлакат автомобиль компаниялари томонидан хорижий харидорларга 3,111 миллион дона улов етказиб берилган, бу бир йил аввалгидан 54,4 фоизга кўпдир.

Хитой автомобиль ишлаб чиқарувчилар ассоциацияси маълумотларига кўра, 2022 йилда бошқа мамлакатларга 2,53 миллион дона енгил автомобиль (+56,7 фоиз) ва 582 минг дона тижорат машиналари (+44,9 фоиз) етказиб берилган. Энг катта ўсиш электромобиллар сегментида қайд этилган бўлиб, уларнинг 679 мингтаси экспорт қилинди, бу ўтган йилга нисбатан 120 фоизга кўпдир.

Хитой автомобиль экспорти бўйича дунёда фақат Германия, АҚШ ва Японияни ортда қолмоқда, бу борада ХХР тўртинчи ўринга кўтарилди. Хитойда ишлаб чиқарилган бензинли автомобилларининг аксарияти Жануби-Шарқий Осиё, Мексика ва Бирлашган Араб Амирликларида сотилади, электромобилларга эса Белгия, Буюк Британия ва Филиппинда талаб юқори.

Хитойнинг энг йирик автомобил экспортчиси MG ва Maxus брендларини ўз ичига олган SAIC консерни ҳисобланади. Иккинчи ўринни “Chery”, учинчи ўринни эса маҳаллий “Tesla” заводи эгаллади.

Хитойдан дунёдаги энг машҳур автомобиллар:
“SAIC” – 906 минг дона;
“Chery” – 452 минг;
“Tesla” – 271 минг;
“Changan” – 249 минг;
“Dongfen” – 242 минг;
“Geely” – 198 минг;
“Great Wall Motor” – 173 минг;
“JAC” – 115 минг;
“BAIC” – 110 минг;
“CNHTS” – 83 минг.

Мамлакатнинг “Citic Securities” инвестиция банки экспертлари 2030 йилга бориб Хитойнинг йиллик автомобиль экспорти 5,5 миллион донага етиши мумкинлигини тахмин қилмоқда. Таъкидланишича, шундан 2,5 миллиони электромобиллар бўлади.

Аввалроқ, Хитойнинг BYD (Build Your Dreams) ва “Ўзавтосаноат” АЖ (UzAuto) янги энергия манбааларида харакатланувчи автомобиллар ишлаб чиқариш бўйича Қўшма Корхона ташкил қилиш келишувини имзолагани хабар қилинган эди.

Қайд этилишича, энг оммабоп янги энергия манбааларида харакатланувчи автомобиллар, жумладан, DM-i туридаги супер гибрид моделлар ва уларнинг бутловчи қисмларини ишлаб чиқарувчи мазкур қўшма корхона Ўзбекистонда жойлашиши режалаштирилган.

Янги ташкил этилган қўшма корхона орқали UzAuto ва BYD компаниялари Ўрта Осиёда ва ундан ташқари худудларда янги энергия манбааларида харакатланувчи автомобиллардан, уларнинг экологик устунликларидан фойдаланишни кенгайтириш ва бозорини янада ривожлантиришни мақсад қилган.

• Экспорт
• Электромобил
• Хитой