Яқин Шарқ давлатларидан эвакуация қилинган ўзбекистонликлар сони 5 март куни 9 361 нафарга етди. Бу ҳақда ТИВ матбуот хизмати хабар берди.

1 мартдан 5 март соат 10:00 ҳолатига кўра, Ўзбекистонга жами 9 361 нафар фуқаро эвакуация қилинди. Саудия Арабистонидан мунтазам ҳамда қўшимча чартер рейслар орқали 8 114 нафар Ўзбекистон фуқаролари ватанга қайтарилди, Бирлашган Араб Амирликларидан 1192 нафар фуқаро Ўзбекистонга олиб келинди. Эрондан 23 нафар, Баҳрайндан 25 нафар, Уммондан 7 нафар фуқаро ватанга хавфсиз етказилди.

Хабарга кўра, фуқароларни Ўзбекистонга қайтариш бўйича чора-тадбирлар тизимли ва босқичма-босқич бажарилмоқда. Айни пайтда эвакуация асосан фуқаролик авиацияси учун ҳаво ҳудуди очиқ бўлиб турган мамлакатлардан амалга оширилмоқда. Минтақанинг бошқа давлатларида ҳаво ҳудуди очилиши билан мазкур тадбирлар тезкор равишда ташкил этилади ва давом эттирилади. Вазирлик фуқароларни хотиржамликни сақлашга, ваҳимага берилмасликка ва вазмин ҳаракатланишга чақирди.

Шунингдек, айни пайтда хорижда бўлиб турган фуқаролардан мазкур мамлакатнинг ички қоидалари ва талабларига қатъий риоя этиш ҳамда фақат Ўзбекистоннинг давлат органлари ва дипломатик ваколатхоналари томонидан тарқатилаётган расмий ахборотга амал қилиш сўралди.

• Эвакуация
• Tashqi ishlar vazirligi
• fuqaro