Жиззах вилоятининг Зомин туманида жойлашган дор йўли аукцион орқали сотилди. Савдолар E-аукцион платформасида бўлиб ўтди.

Аукционга канат йўлини бошқарувчи Zomin Ropeway компаниясининг 100 фоиз улуши қўйилди. Савдолар якунида Ref Ropeway Invest компанияси 215 миллиард 67 минг сўм таклифи билан ғолиб бўлди.

Савдо объекти мажмуаси таркибида Швейсариянинг Bartholet Maschinenbau AG компанияси томонидан ўрнатилган 2 102 метр узунликдаги осма дор йўли ҳамда мижозларни ташиш учун 36 та кабина, шунингдек 351 та ўринли кўп қаватли автотураргоҳ, 152 ўринли ресторан, кафе, болалар ўйин майдончаси ва бошқа хизмат хоналари мавжуд.

Ғолиб компанияга Zomin Ropeway осма дор йўлининг соз ҳолатда бўлиши ва хавфсизлик қоидаларига қатъий риоя қилган ҳолда эксплуатация қилиниши, шу жумладан, осма дор йўлининг тузилиши ва улардан хавфсиз фойдаланиш қоидаларига, дор йўлига техник хизмат кўрсатиш ва таъмирлаш регламентига қатъий риоя қилиниши, шунингдек, ишга малакали ходимларни жалб қилиш бўйича жавобгарлик юклатилди.

Маълумот учун, “Зомин” сайёҳлик-рекреацион зонасида дор йўли 2023 йил август ойида очилган эди.

• Аукцион
• Жиззах
• Zomin